सामाजिक कार्यकर्त्यां आणि ‘अनाथांची माय’ अशी ओळख असणाऱ्या पद्मश्री सिंधुताई सपकाळ यांचं काल उशिरा रात्री पुण्यात हृदयविकाराच्या झटक्याने निधन झालं. वयाच्या ७५ व्या वर्षी त्यांनी पुण्यातील गॅलेक्सी हॉस्पिटलमध्ये अखेरचा श्वास घेतला. सिंधुताईंच्या निधनाची बातमी धक्कादायक असल्याचं सांगत महाराष्ट्रातील राजकीय आणि सामाजिक क्षेत्रामधील अनेक मान्यवरांनी शोक व्यक्त केलाय. पंतप्रधान नरेंद्र मोदींनीही सिंधुताईंना श्रद्धांजली अर्पण केलीय. मोदींनी त्यांच्या ट्विटर अकाऊंटवरुन सिंधुताईंचा फोटो ट्विट करत आपल्या भावना व्यक्त केल्यात.
यंदाच्या वर्षी सिंधुताईंना पद्मश्री पुरस्काराने गौरवण्यात आलं होतं. त्याच सोहळ्यामधील राष्ट्रपती रामनाथ कोविंद यांच्या हस्ते पद्मश्री पुरस्कार स्वीकारतानाचा सिंधूताईंचा फोटो मोदींनी शेअर केलाय. डॉक्टर सिंधुताई सपकाळ या कायमच त्यांनी समाजासाठी केलेल्या चांगल्या कामासाठी लक्षात राहतील. त्यांच्या प्रयत्नांमुळेच अनेक मुलांना चांगलं जीवन जगता आलं. त्यांनी उपेक्षित वर्गातील सामाजासाठीही बरंच काम केलं आहे. त्यांच्या निधनामुळे फार दु:ख झालं आहे. माझ्या सद्भावना त्यांच्या कुटुंबियांबरोबर आणि हितचिंतकांसोबत आहेत. ओम शांती, असं ट्विट पंतप्रधान मोदींच्या अकाऊंटवरुन करण्यात आलं आहे.
https://twitter.com/narendramodi/status/1478423788416946176?t=C3G11FNvA7Wrt89T2vYdJQ&s=19
मुख्यमंत्री उद्धव ठाकरेंनी, सिंधुताईंच्या निधनाची बातमी धक्कादायक आहे. आईच्या ममतेनं हजारो अनाथांचा सांभाळ करणारी ती मातृदेवताच होती. त्यांच्या अचानक जाण्यानं समाजसेवेतील एक प्रेरणादायी व्यक्तिमत्व आपल्यातून हरपले आहे. ज्येष्ठ सामाजिक कार्यकर्त्या पद्मश्री सिंधुताईंना भावपूर्ण श्रद्धांजली, असं म्हणत आपल्या भावना व्यक्त केल्यात.
तर उपमुख्यमंत्री अजित पवार यांनी, ज्येष्ठ समाजसेविका पद्मश्री सिंधुताई सपकाळ यांच्या निधनामुळे समाजातील अनाथांच्या डोक्यावर मायेचे मातृछत्र धरणारी माय हरपली आहे. समाजातील हजारो अनाथ मुला-मुलींचा सांभाळ करुन त्यांच्यावर मायेची पखरण करणाऱ्या सिंधुताईंच्या निधनाने महाराष्ट्राच्या सामाजिक क्षेत्राची मोठी हानी झाली आहे, अशा शब्दांमध्ये सिंधुताईंना श्रद्धांजली अर्पण केलीय.
सिंधुताई सपकाळ यांच्यावर पुण्यातील गॅलेक्सी रुग्णालयात उपचार सुरु होते. काही दिवसांपूर्वीच सिंधुताई यांच्यावर गॅलेक्सी रुग्णालयातच हर्नियाचे ऑपरेशन करण्यात आले. त्यानंतर सिंधुताई यांना पुन्हा एकदा गॅलेक्सी रुग्णालयात दाखल करण्यात होते. सिंधुताई सपकाळ यांच्यावर आज दुपारी अंत्यसंस्कार होणार आहेत. सिंधुताई सपकाळ यांच्यावर शासकीय इतमामात अंत्यसंस्कार करण्याच्या सूचना मुख्यमंत्री उद्धव ठाकरे यांनी दिल्या आहेत.
सामाजिक अत्याचारांना बळी पडलेल्या सिंधुताईंनी महाराष्ट्रात अनाथाश्रम स्थापन केलेत. त्यांना अन्न, शिक्षण आणि निवारा उपलब्ध करुन दिला. ‘अनाथांची माय’ असलेल्या सिंधुताई यांच्या जाण्यानं त्यांची लेकरं पोरकी झाली असून संपूर्ण महाराष्ट्रात हळहळ व्यक्त केली जात आहेत. सिंधुताई सपकाळ यांच्यावर आज दुपारी शासकीय इतमामात अंत्यसंस्कार होणार आहेत.
ताज्या बातम्या
रश्मी ठाकरे मुख्यमंत्रीपद सांभाळणार? ‘या’ शिवसेना नेत्याच्या सुचक विधानाने चर्चांना उधान
“विराट कोहलीचे आकडे पण रहाणे-पुजारासारखेच, त्याला संघातून का काढून टाकत नाही?”
अनाथांचे पोट भरण्यासाठी ट्रेनमध्ये मागितली भीक; स्मशानात जळणाऱ्या प्रेतावर भाकरी भाजून खाल्ली “
..तेव्हा राष्ट्रपती रामनाथ कोविंदही माईंना पाहून खुर्चीवरून उठले होते, पुन्हा व्हायरल होतोय तो व्हिडीओ
