विधान परिषदेच्या १० जागांसाठी २० जूनला निवडणूक होणार आहे. त्यासाठी ९ जूनपर्यंत उमेदवारी अर्ज दाखल करण्याची अंतिम मुदत आहे; तर, १० तारखेला राज्यसभेच्या सहा जागांसाठी मतदान होणार आहे. त्यामुळे विधान परिषदेसाठीही खलबते सुरू आहेत.
विधान परिषद निवडणुकीसाठी भाजपाने यादी जाहीर केली आहे. पाच जणांना उमेदवारी देण्यात आली आहे. मात्र भाजप नेत्या पंकजा मुंडेंना यामध्ये स्थान देण्यात आलेलं नाही. यामध्ये प्रवीण दरेकर, राम शिंदे, प्रसाद लाड, श्रीकांत भारतीय आणि उमा खापरे यांना संधी देण्यात आली आहे.
पंकजा मुंडे आणि चित्रा वाघ यांना मात्र संधी मिळालेली नाही, त्यामुळे अनेकांच्या भुवया उंचवाल्या आहेत. राजकीय वर्तुळात राज्यसभा तसेच विधान परिषदेसाठीही पंकजा मुंडेंना उमेदवारी मिळणार अशा चर्चा सुरू होत्या. मात्र असे असताना देखील राज्यसभेतही पंकजांना उमेदवारी डावलण्यात आली.
दरम्यान, माजी मुख्यमंत्री देवेंद्र फडणवीस यांचे निकटवर्तीय असलेले विधान परिषदेचे विरोधी पक्षनेते प्रवीण दरेकर आणि प्रसाद लाड यांना पुन्हा संधी देण्याची माहिती मिळत आहे. तर दुसरीकडे, पंकजा मुंडे यांचेही पुनर्वसन होण्याची शक्यता वर्तविली जात आहे. त्यामुळे राष्ट्रीय राजकारणातून त्यांची राज्यात घरवापसी होण्याची शक्यता वर्तविली जात आहे.
तर दुसरीकडे पंकजा मुंडेंना विधान परिषदेसाठी उमेदवारी नाकारल्यानंतर चंद्रकांत पाटलांची प्रतिक्रिया दिली आहे. ‘पंकजा मुंडे या मध्य प्रदेश भाजपाच्या सहप्रभारी आहे. मध्य प्रदेश हे मोठं राज्य आहे. त्यांच्यासाठी आणखी काही जबाबदारी केंद्रीय नेतृत्वाच्या कल्पनेमध्ये असेल, असे चंद्रकांत पाटील यांनी सांगितले.
