Uddhav Thackeray and Raj Thackeray : शेतकरी आणि सामान्य जनतेला सत्तेच्या राजकारणात फारसं काही मिळत नाही, पण जेव्हा राजकारणात नात्यांची जोड दिसते, तेव्हा ती काहीशा भावनिक पातळीवर पोहोचते. असंच काहीसं आता ठाकरे बंधू म्हणजेच उद्धव ठाकरे (Uddhav Thackeray) आणि राज ठाकरे (Raj Thackeray) यांच्या भेटीतून दिसतंय. राज यांनी तब्बल १३ वर्षांनी ‘मातोश्री’वर जाऊन उद्धव यांना वाढदिवसाच्या शुभेच्छा दिल्या आणि या भेटीमुळे मुंबईच्या राजकारणात खळबळ उडाली आहे.
राजकीय वर्तुळात या भेटीकडे केवळ औपचारिक शिष्टाचार म्हणून न पाहता त्यामागे मोठं राजकारण असल्याची चर्चा सुरू आहे. शिवसेना (उबाठा) (Shiv Sena UBT) आणि महाराष्ट्र नवनिर्माण सेना (MNS) या दोन बंधूंच्या पक्षांमध्ये युती झाल्यास काय होईल, याचा अंदाज घेण्यासाठी भारतीय जनता पक्ष (BJP)नं एका खास सर्वेक्षणाचा आधार घेतला आहे. आणि त्याचे निष्कर्ष पाहून महायुती गोटात खळबळ उडाली आहे.
या सर्व्हेनुसार ठाकरे बंधू एकत्र निवडणूक लढवले, तर त्यांना तब्बल ५२ टक्के जनमत मिळण्याची शक्यता आहे. विशेषतः मुंबई महानगर प्रदेश (MMR) म्हणजेच मुंबई, ठाणे, नवी मुंबई, कल्याण-डोंबिवली, उल्हासनगर, भिवंडी-निजामपूर, वसई-विरार, मिरा-भाईंदर आणि पनवेल या ९ महापालिकांमध्ये हे दोन्ही पक्ष एकत्र आल्यास भारतीय जनता पक्षाचं (BJP) सगळं गणित कोलमडू शकतं.
जर ठाकरे बंधू वेगवेगळे राहिले, तर उबाठा शिवसेनेला (Shiv Sena UBT) २४ टक्के आणि मनसेला (MNS) १२.५ टक्के मतं मिळण्याचा अंदाज आहे. पण जर त्यांनी युती केली, तर त्यांचे मतसंख्या आकडे थेट दुपटीहून अधिक वाढण्याची शक्यता व्यक्त झाली आहे. याचा परिणाम म्हणजे भाजपचं मुंबई महापालिका जिंकण्याचं दीर्घकालीन स्वप्न अधुरं राहू शकतं.
या सर्व घडामोडी पाहता, राज आणि उद्धव यांच्यातील वैयक्तिक आणि राजकीय संबंध आता केवळ भेटीतच नाही तर मतांच्या गणितातही निर्णायक ठरणार आहेत. शिवसेना (उबाठा) आणि मनसेने जर खरंच युती केली, तर भाजपला (BJP) मुंबई महानगर प्रदेशातील सत्ता राखणं अवघड होईल, असा इशारा त्यांच्या स्वतःच्याच सर्वेक्षणातून समोर आलाय.
राजकीय दृष्टिकोनातून ही युती केवळ भाजपसाठी धोक्याची घंटा नसून, महाराष्ट्रातील आगामी निवडणुकांचे स्वरूपच बदलवू शकणारी ठरू शकते. आता पुढील काही दिवसांत या दोघा बंधूंमध्ये काय ठरतं, हे पाहणं औत्सुक्याचं ठरणार आहे.
