राजकारणात प्रचंड भ्रष्टाचार चालतो याबद्दल आपण कित्येक वेळा ऐकलं आहे, मात्र, भ्रष्टाचाराची मूळं किती खोलपर्यंत आणि किती खालच्या पातळीवर रुजलेली आहेत ते एका घटनेमधून समोर आलं आहे. ही घटना बुलडाण्यात घडली आहे. सध्या या घटनेची सर्वत्र चर्चा होत आहे.
बलुडाणा जिल्ह्यातील मेहकर तालुक्यातील डोनगाव ग्रामपंचायतीची ग्रामपंचायत सचिव ज्ञानेश्वर चनखोरे डोनगाव ग्रामपंचायतीत नवख्या असलेल्या महिला सरपंचांना चक्क भ्रष्टाचाराचे पाठ शिकवत आहे. एवढेच नाही तर याबाबतचे सीसीटीव्ही फुटेज देखील समोर आले आहेत.
महिला सरपंचांना भ्रष्टाचाराचे धडे देताना व्हिडीओ रेकॉर्डिंग देखील झाली आहे. सध्या हा व्हिडीओ सोशल मीडियावर प्रचंड व्हायरल झाला आहे. यामध्ये ग्रामसचिव हा महिला सरपंचाला म्हणतो की, पावसाळा लागला की जनतेच्या प्रश्नावर आपण कान आणि डोळे बंद करून घ्यायचे आणि जसं जळत तसं जळू द्यायचं कारण जनता बदमाश आहे.
तसेच ग्रामसचिव म्हणतो की, तुम्हाला जनतेने पैसे घेऊनच मतदान केलं आहे. एकाही चोराने फुकट मतदान केलं नाही. मतदान करणारे चोर आहेत. आपण इथे पैसे खाण्यासाठी बसलो असून पैसे खाणे हा आपला अधिकार आहे. त्याच्या या बोलण्याचे व्हिडीओ रेकॉर्डिंग झाले आहे.
या व्हिडिओमध्ये ग्रामपंचायत सचिव चनखोरे, महिला सरपंच रेखा पांडव, महिला सरपंचाचा पती रवी पांडव, ग्रामपंचायतीचे कर्मचारी गणेश घोगल व प्रदीप परमाळे असे सर्व ग्रामपंयातीच्या कार्यालयात बसलेले असतानाचे सीसीटीव्ही फुटेज आहेत.
हे संभाषण बाहेर व्हायरल झाल्यावर आता ग्रामस्थ व ग्रामपंचायत सदस्य आक्रमक असून या सर्व प्रकाराची चौकशी करून या भ्रष्ट ग्रामसेवकावर कारवाईची मागणी आता होऊ लागली आहे. यावर आता ग्रामपंचायत सचिव चनखोरे यांनी उत्तर दिलं की, अशा सीसीटीव्ही मध्ये आवाज रेकॉर्ड होत नाही, या व्हिडिओचे एडिटिंग करून आवाज टाकला आहे असे म्हणत त्यांनी आरोपांचे खंडन केले आहे.
