T20 World Cup 2022: T20 World Cup 2022 मध्ये टीम इंडियाचा एक खेळाडू खूप चर्चेत आहे. हा खेळाडू मैदानात चौफेर फटके खेळण्यासाठी ओळखला जातो. या खेळाडूने आपल्या खेळाबाबत मोठा खुलासा केला आहे. या खेळाडूचे म्हणणे आहे की, टेनिस बॉल क्रिकेट खेळून त्याने असे उत्कृष्ट शॉर्ट्स खेळण्यात प्रभुत्व मिळवले आहे. हा खेळाडू दुसरा कोणी नसून टीम इंडियाचा स्टार सूर्यकुमार यादव आहे.
सूर्यकुमार यादवने झिम्बाब्वेचा वेगवान गोलंदाज रिचर्ड नागरवा याला मारलेला षटकार हा टी-20 विश्वचषकात चर्चेचा विषय ठरला आहे. सूर्यकुमार यादवने टेनिस बॉल क्रिकेट खेळताना या शॉटवर प्रभुत्व मिळवल्याचे सांगितले. रविवारी मेलबर्न क्रिकेट मैदानावर सूर्यकुमारने संस्मरणीय खेळी खेळली. त्याने 25 चेंडूत नाबाद 61 धावांची खेळी केल्याने भारताने 5 बाद 186 अशी भक्कम धावसंख्या उभारली.
डावाच्या शेवटच्या चेंडूवर मारलेला त्याचा तो फटका सर्वोत्तम ठरला. त्याने ऑफ-स्टंपच्या पूर्ण बाहेर जात गुडघा टेकवून रिचर्ड नागरवाला षटकार मारला. रवी शास्त्री आणि सुनील गावसकर या माजी खेळाडूंनी त्याच्या या फटक्याचे कौतुक केले आहे. या सामन्यानंतर सूर्यकुमार स्टार स्पोर्ट्सच्या कार्यक्रमात म्हणाला, ‘त्या वेळी गोलंदाज कोणता चेंडू टाकणार आहे, हे आधीच माहीत असते. टेनिस बॉल क्रिकेट खेळताना मी या शॉटचा जोरदार सराव केला होता. त्यामुळे हा फटका मारणे मला सोपे जाते.
सूर्यकुमार यादव म्हणाला, ‘त्यावेळी गोलंदाज काय विचार करत असेल हे तुम्हाला कळायला हवे. मग मी स्वतःवर विश्वास ठेवतो. सीमारेषा किती दूर आहे हे मला माहिती होते. जेव्हा मी क्रीजवर असतो तेव्हा मला वाटते की सीमारेषा फक्त 60-65 मीटर दूर आहे. आणि मी चेंडूचा वेग ओळखून शॉट खेळण्याचा प्रयत्न करतो. मी चेंडू बॅटच्या योग्य जागेवर घेण्याचा प्रयत्न करतो आणि जर तो योग्य प्रकारे मारला गेला तर तो सीमारेषेच्या बाहेर जातोच.
