उद्या संपूर्ण महाराष्ट्रात वटपोर्णिमा सण साजरा केला जाणार आहे. या सणादिवशी पत्नी आपल्या पतीच्या दिर्घायुष्यासाठी पिंपळाच्या झाडाची पुजा करून सात जन्म तोच पती मिळावा यासाठी प्रार्थना करत असते. मात्र आता औरंगाबाद मधून एक घटना समोर येत आहे, पत्नीपीडीत पतींनी पिंपळाच्या झाडाला फेऱ्या मारत हीच पत्नी पुढचे सात जन्म नको अशी प्रार्थना केली आहे.
सध्या पत्नीपिडीत पुरुषांनी केलेल्या या अनोख्या आंदोलनाची चर्चा राज्यभर होत आहे. औरंगाबादच्या वाळूज भागात असलेली पत्नीपीडित नावाची ही संघटना नेहमीच पत्नीच्या छळापासून त्रासलेल्या नावऱ्यांना मदत करण्याचे काम करते. यांच्या वतीने हे अनोखे आंदोलन करण्यात आले आहे. पिंपळाच्या झाडाला गोल फिरत दोरा बांधून मुंजा असलेल्या पिंपळाच्या झाडाची पूजा या पत्नीपीडित पुरुषांनी केली आहे.
तसेच पुढील ७ जन्मच काय ७ सेकंद सुद्धा अशी बायको नको, अशा घोषणा देखील त्यांनी दिली आहे. यावेळी पिंपळाच्या झाडाला उलट्या १०८ प्रदक्षिणा घालत पत्नीपीडित पुरुषांनी पूजन देखील केले आहे. तसेच पुरुषांना त्रास देणा-या महिलांचा सदर पुरुषांनी निषेध देखील केला. सध्या याची प्रचंड चर्चा होत आहे.
या आंदोलनात पुरुषांनी थेट यमराजाकडे आपलं मनोगत व्यक्त केलं आहे. पुरुषांनी महिलांच्या अगोदर वटपौर्णिमा साजरी केली आहे. पिंपळाच्या झाडाला दोरा बांधत प्रदक्षिणा घातल्या आणि थेट यमराजाकडे मनोगत व्यक्त करत म्हटलं आहे की, वटपोर्णिमा साजरी करताना नवऱ्याला छळणाऱ्या बायकांचं ऐकू नको त्या खोटं बोलत आहेत.
तसेच या जन्मी मिळाली, पुढच्या जन्मीतरी, अशी बायको देऊ नको, असं म्हणत यमराजाकडे आपलं मनोगत व्यक्त केलं. माहितीनुसार, औरंगाबादच्या वाळूज भागात पत्नी पिडितांसाठीचं महाराष्ट्रातील पहिलं आश्रम तयार करण्यात आलं आहे. सहा पुरूषांनी एकत्र येत सुरूवातीला हे आश्रम सुरू केलं होतं.
या आश्रमाला जोडणाऱ्या पुरूषांची संख्या आता दिवसेंदिवस वाढत जात आहे. कायदे महिलांच्या बाजूने उभे आहे, आणि समाजाची सहानुभूती देखील महिलांना मिळते. त्यामुळे काही वेळा पुरूषांची चूक नसताना देखील त्यांना नाहक त्रास सहन करावा लागतो. त्याचमुळे हे आश्रम खास पुरूषांसाठी स्थापन करण्यात आले आहे. या आश्रमात दरवर्षी पत्नीपीडित नवरोबांची पिंपळपौर्णिमा साजरी केली जाते.
