सध्या सर्वत्र ‘गणपती बाप्पा मोरया’ चा जयघोष सुरू आहे. सर्वजण गणपती बाप्पाचं स्वागत अतिशय जल्लोषात करत आहेत. दरम्यान, अनेक बॉलिवूड सेलिब्रिटींच्या घरी देखील बाप्पाचे आगमन झाले आहे. शिल्पा शेट्टीपासून ते शाहरुख खानपर्यंत सर्व सेलिब्रिटींनी आपापल्या घरी गणपतीचे स्वागत केलं आहे.
याचवेळी, सैफ अली खान आणि अमृता सिंग यांची मुलगी सारा अली खाननेही बाप्पाचे स्वागत केले. साराने बाप्पासोबतचे काही फोटो शेअर केले आहेत, ज्यामध्ये तिच्यासह तिची आई अमृताही दिसते आहे. मात्र, या फोटोंवरून आता ती ट्रोल होत आहे.
सारा अली खानने गणेश चतुर्थीच्या दिवशी इन्स्टाग्रामवर काही फोटो शेअर केले. यामध्ये अमृता आणि सारा बाप्पाचे आशीर्वाद घेताना दिसत आहेत. साराने कॅप्शनमध्ये लिहिले आहे की, ‘गणेश चतुर्थीच्या शुभेच्छा, गणपती बाप्पा मोरया’. आता काही ट्रोलर्सनी या फोटोंवरुन सारा खानला लक्ष्य केले आहे.
अनेकांनी तिच्या या फोटोवर कमेंट्स केल्या आहेत की, ‘लाज वाटली पाहिजे की मुस्लिम असूनही ती या गोष्टी करते आहे’. एका युजरने अशीही कमेंट केली आहे की, ‘साराने पैशासाठी तिचा धर्मही विकला’. अशाप्रकारे अत्यंत असभ्य भाषेतील कमेंट्स या अभिनेत्रीच्या पोस्टवर लोकांनी केल्या आहेत.
मात्र, दुसरीकडे अनेक यूजर्स साराला पाठिंबाही देताना दिसत आहेत. अनेक चाहत्यांचे म्हणणे आहे की, ती असे काम करून समाजात एक चांगला संदेश देत आहे. एका चाहत्याने लिहिले आहे की, ट्रोलर्सच्या बोलण्याकडे लक्ष देऊ नको. एवढेच नाही तर अभिनेत्रीच्या पोस्टवर तिचे चाहते आणि ट्रोलर्स एकमेकांशी भांडतानाही दिसत आहेत.
दरम्यान, साराने अनेक वेळा सांगितले आहे की, ती कोणत्या एका धर्म किंवा जातीवर विश्वास ठेवत नाही. तिला जिथे चांगली आणि सकारात्मक ऊर्जा मिळते, तिथे ती पोहोचते. मग ते गुरुद्वारा असो किंवा मंदिर. याआधी ती केदारनाथमधील फोटो शेअर केल्यामुळेही ट्रोल झाली होती.
