एकनाथ शिंदे यांनी बंड केल्यानंतर आपल्या डायलॉगवरून प्रसिद्ध झालेले शहाजी पाटील यांच्यावर टीका करण्यात आली आहे. शहाजी पाटील हे काय झाडी, काय डोंगर या डायलॉगवरून प्रसिद्ध झाले होते. त्यांच्यावर आता शिवसेनेच्या पदाधिकाऱ्याने खोचक टीका केली आहे.
पंढरपूरमधील शिवसेनेचे जिल्हाप्रमुख गणेश इंगोले यांनी सोशल मीडियातून शहाजी बापू पाटलांना प्रत्युत्तर दिलं आहे. त्यांनी शहाजी पाटलांना अतिशय झोंबणारी टीका केल्यामुळे सध्या त्यांनी केलेली पोस्ट तुफान व्हायरल झाली आहे. राजकीय वर्तुळात सध्या त्याचीच चर्चा होत आहे.
गणेश इंगोले यांनी पोस्ट केली आहे की, बापू मतदार संघात लक्ष द्या, महाराष्ट्र करमणूक दौरा बंद करा…काय दारु…काय चकणा.. काय ते ५० खोके समदं कसं ओके…. आहे तर आधी याच खोक्यातून बायकोसाठी साडी घेऊन या असा सल्ला गणेश इंगोले यांनी दिला आहे.
दरम्यान, शहाजी बापू पाटील आता जणू शिंदे सेनेचे ब्रँड झाले आहेत, पाटील यांनी काही दिवसांपूर्वी आदित्य ठाकरेंवरही जोरदार टीका केली होती. या टिकेमुळे दुखावलेले शिवसेनेचे पदाधिकारी आता त्यांना प्रत्युत्तर देत आहेत. त्यामुळे आता सोलापूर-पंढरपूरात दोन गटातील शिवसेनेचा वाद चांगलाच उफाळून येणार असं दिसत आहे.
शहाजी बापू पाटील यांच्याबद्दल अधिक माहिती म्हणजे, एकनाथ शिंदे गटात गेल्यानंतर काय झाडी, काय डोंगर हा त्यांचा डायलॉग फेमस झाला. अनेक ठिकाणी मुलाखती झाल्या. आमदार असून निधी कमी पडतोय, खूप गरीबीत राहतोय, असं त्यांनी एका मुलाखतीत सांगितलं होतं.
त्यातच किती दिवस झाले, बायकोला साडीही घेऊ शकलो नाही, असंही त्यांनी म्हटलं होतं. त्यामुळेच पंढरपूरच्या युवासेना नेत्यानं त्यांना आधी ती साडी घेऊन या असा सल्ला दिला आहे. काल गणरायासमोर काय साकडं घातलं, यावर त्यांना विचारलं असता ते म्हणाले, मातोश्रीवर सुख समृद्धी दाबून दे, रश्मी वहिनींना सुखी आनंदी ठेव, अशी प्रार्थना केल्याचं त्यांनी म्हटलं. यावर त्यांना शिवसेनेतून प्रतिउत्तर मिळाले आहे.
