विधानपरिषद निवडणूकीचा निकाल जाहीर झाल्यानंतर एकनाथ शिंदे यांच्या नेतृत्वाखाली शिवसेनेच्या बहुसंख्य आमदारांनी बंडखोरी केली. त्यांनी भाजपशी युती केली. शिवसेनेला मोठा धक्का बसला, आणि राज्यातील महाविकास आघाडीचे सरकार कोसळले.
त्यानंतर, राज्यात एकनाथ शिंदे यांच्या नेतृत्वाखाली नवीन सरकार स्थापन झालं. शिवसेनेचे शिंदे आणि ठाकरे असे दोन गट पडले. एवढेच नाही तर शिंदे यांनी पुढे शिवसेना पक्षप्रमुख उद्धव ठाकरे यांना आव्हान दिले, आणि शिवसेना पक्षावरच दावा केला.
आता, आगामी महापालिका निवडणुकीत शिवसेनेचं धनुष्यबाण हे चिन्ह आपल्याला मिळावं यासाठी देखील शिंदे गटाचे जोरदार प्रयत्न सुरु आहेत. दादर येथील शिवसेना भवन हे शिवसेना पक्षाचे मध्यवर्ती कार्यालय आहे. शिंदे गट शिवसेना भवनावर दावा करत असल्याची चर्चा सुरु असताना आता शिदें गटाने शिवसेना मध्यवर्ती कार्यालयाचा पत्ताच बदलला अशी बातमी समोर येत आहे.
शिंदे गटाच्या लेटरहेडवर दादरच्या शिवसेना भवनाऐवजी ठाण्याच्या टेंभी नाक्याचा पत्ता देण्यात आला आहे. पदाधिकाऱ्यांना देण्यात येणाऱ्या नियुक्ती पत्रावर हा नविन पत्ता टाकण्यात आला आहे. राजकीय वर्तुळात सध्या याचीच चर्चा सुरू आहे.
शिंदे गटाने विविध पदाधिकाऱ्यांच्या नियुक्त्या जाहीर केल्या आहेत. शिवसेना उपनेते यशवंत जाधव यांची मुंबईतील विभागप्रमुख पदी नियुक्ती करण्यात आली आहे. जाधव यांना देण्यात आलेल्या नियुक्तीपत्रावर नव्या शिवसेना मध्यवर्ती कार्यालयाचा पत्ता दिला आहे.
शिंदे गटाकडून जारी केलेल्या नियुक्ती पत्रावर ठाण्याच्या टेंभी नाका येथील आनंदआश्रमचा पत्ता टाकण्यात आला आहे. याआधी शिवसेना मध्यवर्ती कार्यालय म्हणून दादर येथील शिवसेना भवनचा उल्लेख केला जात असे. मात्र, शिंदे गटाकडून प्रसिद्ध करण्यात आलेल्या या नियुक्ती पत्रकावर प्रथमच ठाण्यातील आनंदआश्रमच्या पत्त्याचा उल्लेख मध्यवर्ती कार्यालय असा करण्यात आला आहे.
