शिवसेना नेते संजय राऊत यांचे भाऊ सुनील राऊत यांनी काल मातोश्रीवर जाऊन पक्षप्रमुख उद्धव ठाकरे यांची भेट घेतली. त्यानंतर त्यांनी प्रसारमाध्यमांशी संवाद साधला. यावेळी त्यांनी मुख्यमंत्री एकनाथ शिंदे यांच्यावर निशाणा साधत संजय राऊतांना लवकरच जामीन मिळेल असा विश्वास व्यक्त केला.
सुनील राऊत म्हणाले, उद्धव ठाकरे आमचे पक्षप्रमुख आहेत. संजय राऊत यांना चुकीच्या पद्धतीने तुरुंगात टाकण्यात आले आहे. जरी उद्धव ठाकरे हे शिवसेनेचे पक्षप्रमुख असले तरी ते आता माझ्या राऊत कुटुंबाचे देखील प्रमुख आहेत. त्यांनी मला बोलावून कुटुंबाची विचारपूस केली.
सुनील राऊत यांनी संजय राऊतांना जामीन कधी मिळणार याबाबत बोलताना म्हटलं की, सजंय राऊत यांच्या जामिनासाठी अर्ज केलेला आहे. मला खात्री आहे की संजय राऊत यांच्यावर कुठलाही गुन्हा नसल्याने त्यांना लवकरात लवकर जामीन मिळेल. तसेच त्यांनी यावेळी मुख्यमंत्री एकनाथ शिंदे यांच्यावर निशाणा साधला.
म्हणाले, सध्या मुख्यमंत्री एकनाथ शिंदे आहेत, मात्र प्रत्यक्षात सरकार मात्र देवेंद्र फडणवीस हे चालवतात. सरकार चालवण्यासाठी आमचे मुख्यमंत्री मजबूत होते, कोरोना काळात उद्धव ठाकरे यांनी जे काम केलं आहे, ते जगातला कुठलाही मुख्यमंत्री करू शकत नाही.
उद्धव ठाकरे यांच्या प्रयत्नामुळेच कोरोना अटोक्यात आला. उद्धव ठाकरे यांनी त्यावेळी कोरोना काळात निर्बंध घातला म्हणूनच आपण यंदाचा गणेशोत्सव मोठ्या उत्साहात साजरा करू शकत आहोत, असे म्हणत सुनील राऊत यांनी उद्धव ठाकरेंचे कौतुक केले.
तसेच म्हणाले, दसरा मेळावा हा शिवसेनेचा होता हा इतिहास आहे. शिवसेना प्रमुख बाळासाहेब ठाकरे यांनी शिवाजी पार्कमध्ये दसरा मेळावा घेण्यास सुरुवात केली. पुढे उद्धव ठाकरे यांनी ही परंपरा कायम ठेवली आहे. कोणीही कितीही दावा केला तर ओरिजनल ते ओरिजनल आणि गद्दार ते गद्दराच राहणार आहेत.
