Sanjay Raut on Disha Salian: दिशा सालियन (Disha Salian) हिच्या मृत्यू प्रकरणात कोणतीही शंका न उरल्याचे स्पष्ट करत महाराष्ट्र सरकारच्या (Maharashtra Government) वकिलांनी मुंबई उच्च न्यायालयात (Bombay High Court) निवेदन दिले आहे. त्यानुसार, ही आत्महत्येची घटना असून, शिवसेना (Shiv Sena) आमदार आदित्य ठाकरे (Aaditya Thackeray) यांच्याविरोधात कोणताही सबळ पुरावा आढळलेला नाही. त्यामुळे त्यांना न्यायालयीन क्लीन चिट देण्यात आली आहे.

नितेश राणेंवर संजय राऊतांचा घणाघात

या पार्श्वभूमीवर शिवसेना (ठाकरे गट) खासदार संजय राऊत (Sanjay Raut) यांनी पत्रकारांशी बोलताना भाजप (BJP) आमदार नितेश राणे (Nitesh Rane) यांच्यावर परखड शब्दांत टीका केली. राऊत म्हणाले, “राणेंच्या नेपाळ्यासारख्या टिल्ल्या लेकाने नाक घासून माफी मागावी! त्याचे नावही मला माहीत नाही. तो केवळ बडबड करणारा आहे. आदित्य ठाकरेंना खोट्या आरोपांमध्ये गोवण्याचा प्रयत्न केला गेला, याची जबाबदारी मुख्यमंत्री एकनाथ शिंदे (Eknath Shinde) आणि उपमुख्यमंत्री देवेंद्र फडणवीस (Devendra Fadnavis) यांच्यावर आहे. त्यांनाही माफी मागावी लागेल,” असे रोषाने ते म्हणाले.

दिशाच्या वडिलांनी आपल्या याचिकेत म्हटले होते की, “त्यांच्या मुलीवर बलात्कार करून तिची हत्या करण्यात आली असून हे प्रकरण दडपण्याचा प्रयत्न झाला.” त्यांनी या प्रकरणात आदित्य ठाकरे यांचाही सहभाग असल्याचा आरोप करत एफआयआर नोंदवण्याची मागणी केली होती.

मात्र, सरकारकडून मालवणी पोलिस ठाण्याचे वरिष्ठ निरीक्षक शैलेंद्र नगरकर (Shailendra Nagarkar) यांनी यावर सविस्तर उत्तर सादर करत सांगितले की, “ही सर्व माहिती निराधार असून, तपासात असा कोणताही पुरावा आढळलेला नाही.” वैज्ञानिक अहवाल आणि पोस्टमॉर्टम तपासणीच्या आधारे क्लोजर रिपोर्टही दाखल करण्यात आला आहे.

प्रकरणाचा राजकीय इतिहास

दिशा सालियन हिचा 8 जून 2020 रोजी मालाड (Malad, Mumbai) येथील इमारतीच्या 14व्या मजल्यावरून पडून मृत्यू झाला. काही दिवसांनी म्हणजेच 14 जून 2020 रोजी अभिनेता सुशांत सिंग राजपूत (Sushant Singh Rajput) याचा मृत्यू झाला. त्यामुळे दोन्ही प्रकरणे जोडली गेली.

2022 मध्ये महाराष्ट्र विधानसभेतही हे प्रकरण गाजले होते. भाजपचे आमदार नितेश राणे आणि शिवसेना आमदार भरत गोगावले (Bharat Gogawale) यांनी विधानसभेत दिशा प्रकरणाची चर्चा करत तपासाची मागणी केली होती. त्यावेळी राणे यांनी आदित्य ठाकरे यांची नार्को टेस्ट घेण्याची गरज असल्याचं वक्तव्य केलं होतं.

दिशा सालियन कोण होती?

दिशा सालियन ही एक सेलिब्रिटी मॅनेजर होती. तिने वरुण शर्मा (Varun Sharma), सुशांत सिंग राजपूत, भारती सिंग (Bharti Singh) यांसारख्या कलाकारांसोबत काम केले होते. तिचं काही काळ अभिनेता रोहन राय (Rohan Rai) याच्याशी प्रेमसंबंध होते. मृत्यूपूर्वी काही महिन्यांपूर्वी तिचं लग्नही झालं होतं.