राष्ट्रवादीच्या नेत्या रुपाली चाकणकर यांनी नुकताच महिला प्रदेशाध्यक्षपदाचा राजीनामा दिला आहे. त्यामुळे आता राष्ट्रवादी काँग्रेसच्या पुढच्या महिला प्रदेशाध्यक्ष कोण असणार याची सर्वत्र चर्चा होत आहे. अशावेळी राष्ट्रवादीत नुकताच प्रवेश केलेल्या रुपाली पाटील ठोंबरे यांनी केलेल्या एका वक्तव्याची चर्चा होत आहे.
रुपाली चाकणकर यांच्याकडे महिला आयोगाचं अध्यक्षपद आणि सोबतच राष्ट्रवादीच्या महिला प्रदेशाध्यक्ष पदाचे पद देखील होते. गेल्या काही दिवसांपासून त्या राजीनामा देणार अशी चर्चा होती. अखेर चाकणकर यांनी राष्ट्रवादीच्या महिला प्रदेशाध्यक्षपदाचा राजीनामा दिला. त्यानंतर राष्ट्रवादीकडून लवकरच नव्या महिला अध्यक्षाची घोषणा होईल, असे सांगण्यात आले. महिला अध्यक्षपदी कोणाची निवड होणार याबद्दल चर्चा सुरू झाली.
त्यांच्या राजीनाम्यानंतर रुपाली पाटील ठोंबरे यांनी वक्तव्य केलं आहे. रुपाली पाटील ठोंबरे म्हणाल्या की, महिला प्रदेशाध्यक्षपदी मला जर संधी मिळाली तर मी अत्यंत चांगलं काम करेन. संधीचं सोनं करेल. ज्या विश्वासानं मला पक्षात प्रवेश दिला तो विश्वास सार्थ ठरवेन, अशा त्या म्हणाल्या.
रुपाली पाटील ठोंबरे यांनी या संदर्भात एक व्हिडीओ प्रदर्शित केला आहे. त्यात त्या म्हणाल्या की, राष्ट्रवादीच्या नेत्या रुपाली पाटील-चाकणकर यांनी महिला प्रदेशाध्यक्षपदाचा राजीनामा दिला आहे. त्यांनी प्रदेशाध्यक्षपदी काम करताना ही जबाबदारी अत्यंत उत्तमपणे पेलली.
तसेच म्हणाल्या, एका व्यक्तीला दोन पदे असू नयेत म्हणून त्यांनी प्रदेशाध्यक्ष पदाचा राजीनामा दिला. राज्य महिला आयोगाच्या अध्यक्षा म्हणून त्या चांगलं काम करत आहेत. महिलांवर होणाऱ्या अन्यायावर त्यांनी तत्परतेने काम केलं आहे. आता महिला प्रदेशाध्यक्षपदी मला जर संधी मिळाली तर मी अत्यंत चांगल्या पद्धतीने काम करेन. ज्या विश्वासाने मला पक्षात प्रवेश दिला तो विश्वास सार्थ करेन, अशी इच्छा पाटील यांनी बोलून दाखवली.
गेल्या वर्षी ऑक्टोबरमध्ये रुपाली चाकणकर यांची राज्य महिला आयोगाच्या अध्यक्षपदी नियुक्ती झाली होती. त्यानंतर आतापर्यंत त्यांच्याकडेच राष्ट्रवादी महिला प्रदेशाध्यक्षपदाचा कार्यभार होता. काल त्यांनी त्या पदाचा राजीनामा दिला असून त्या ठिकाणी आता रुपाली पाटील ठोंबरे यांची वर्णी लागणार का याकडे सर्वांचे लक्ष आहे.
