आयपीएलमधील यशस्वी खेळाडूंपैकी ज्याचे नाव चर्चेत असते तो म्हणजे सुरेश रैना होय. आयपीएलच्या लिलावात त्याच्यावर कोणत्याही टीमने बोली लावली नाही. रैनाला या सिझनपूर्वी चेन्नई सुपर किंग्सने मुक्त केले होते. त्यानंतर त्याला चेन्नईसह एकाही आयपीएल टीमनं खरेदी केले नाही. मात्र आता एका ट्विटमुळे सुरेश रैना आयपीएलच्या एका टीममध्ये सामील होणार असल्याच्या चर्चेला उधाण आलं आहे.
आता ही टीम म्हणजे दुसरं तिसरं कोणी नसून गुजरात टाइटंस आहे. यासंदर्भातील एक ट्विट सध्या सोशल मीडियावर व्हायरल झालं आहे. इंग्लंडच्या जेसन रॉयने आयपीएलमधून त्याचं नाव काढून घेतल्याने आता सुरेश रैनाला गुजरात टायटंसमध्ये एंट्री मिळू शकते असं या ट्विटमध्ये म्हटलेले आहे.
गुजरात टाइटंसमध्ये त्याच्या प्रवेशाचे अंदाज बांधले जात असण्याचे कारण म्हणजे, सलामीवीर जेसन रॉय. वास्तविक जेसन रॉयने आयपीएलच्या या हंगामातून आपले नाव मागे घेतले आहे. त्यानंतर रॉयच्या जागी रैनाच्या संघात प्रवेश करण्याबाबत चाहत्यांच्या अपेक्षा वाढल्या आहेत आणि चाहते टायटन्स नावाच्या जर्सीसह रैनाचा फोटो एडिट करत आहेत आणि सोशल मीडियावर शेअर करत आहेत.
गुजरात संघाचा ओपनर जेसन रॉय याला 2 कोटी रुपयांनी संघात समाविष्ट करून घेतलं होतं. जेसन रॉयने गुजरात संघ सोडल्याची माहिती मिळाली आहे. त्यामुळे या संघासमोरच्या अडचणी वाढल्या आहेत. पहिल्यांदाच आयपीएलमध्ये सहभागी होणाऱ्या गुजरात संघाला मोठा धक्का बसला आहे. त्यामुळे रैनाच्या चर्चा होऊ लागल्या आहेत.
रैना मागच्या सीजनमध्ये काही खास कमागिरी करु शकला नाही. 2 कोटी बेस प्राईज असलेल्या रैनावर यंदा कोणीही बोली लावली नाही. त्यामुळे सुरेश रैना पुढे काय करणार याकडे त्याच्या चाहत्यांचं लक्ष लागलंय. यापूर्वी अशी चर्चा झाली होती की, तो आयपीएलमधील संघ RCB सोबत जोडला जाऊ शकतो.
दरम्यान, आयपीएलच्या इतिहासातील सर्वाधिक धावा करणाऱ्यांमध्ये सुरेश रैना चौथ्या क्रमांकावर आहे. रैनाने 205 आयपीएल सामन्यांमध्ये 5,528 धावा केल्या आहेत. त्याच्या पुढे फक्त विराट कोहली, शिखर धवन आणि रोहित शर्मा आहेत. यापैकी रैनाने चेन्नई फ्रँचायझीसाठी 4687 धावा केल्या आहेत. तो चेन्नई सुपर किंग्जसाठी आयपीएलमध्ये सर्वाधिक धावा करणारा खेळाडू आहे.
