Prasad Lad Letterhead Forgery Case : मुंबईतील (Mumbai) सायन पोलिसांनी नुकताच उघड केलेल्या बनावट लेटरहेड प्रकरणात भाजप (BJP) विधान परिषदेचे आमदार प्रसाद लाड (Prasad Lad) यांच्या नावाचा गैरवापर केल्याची धक्कादायक माहिती समोर आली आहे. या प्रकरणातील मुख्य संशयित अमित सोळुंके (Amit Solunke) हा भारतीय जनता युवा मोर्चाचा (Bharatiya Janata Yuva Morcha) माजी प्रदेश सचिव असून, पक्षातून त्याला मागील वर्षीच पदमुक्त करण्यात आले होते.

कंत्राटासाठी बनावट लेटरहेडचा वापर

सायन पोलिसांच्या तपासानुसार, सोळुंकेने रत्नागिरीतील (Ratnagiri) एका रस्त्याच्या कंत्राटासाठी आमदार लाड यांच्या लेटरहेडवर बनावट सही करून 3 कोटी 60 लाख रुपयांचा निधी बीड जिल्ह्याकडे वळवण्याचा प्रयत्न केला. हे पत्र रत्नागिरी जिल्हा नियोजन कार्यालयामार्फत पाठवण्यात आले होते.

२ जुलै २०२५ रोजी याबाबत अधिकृत एफआयआर दाखल करण्यात आला. या अगोदरच, २७ जूनला प्रसाद लाड यांचा नोडल जिल्हा रत्नागिरीहून मुंबईला बदलण्यात आला होता. तरीदेखील त्यांच्या नावाने बनावट पत्र बीडसाठी पाठवण्यात आल्याचे उघड झाले.

प्रकरण उघडकीस कसे आले?

आमदार लाड यांचे सहाय्यक सचिन राणे (Sachin Rane) यांना जिल्हा नियोजन अधिकारी संदीप भाकरे (Sandeep Bhakre) यांनी संशयास्पद पत्राची माहिती दिली. तपासात हे पत्र प्रशांत लांडे (Prashant Lande) यांनी बीड जिल्हा नियोजन कार्यालयात दिले असल्याचे समोर आले. लांडेंनी सांगितले की, ते त्यांना निलेश वाघमोडे (Nilesh Waghmode) यांनी दिले. वाघमोडे यांनी सांगितले की, ते सचिन बनकर (Sachin Bankar) यांनी दिले होते.

सायन पोलिसांच्या मते, हे सर्व जण सोळुंकेकडून दिशाभूल झाले असावेत. कंत्राट मिळवून देण्याचे आश्वासन देत सोळुंकेने त्यांच्याकडून कमिशन घेतले असण्याची शक्यता आहे.

अमित सोळुंकेवर थेट आरोप

तपासानंतर पोलिसांनी स्पष्ट केले की, बनावट कागदपत्रांची निर्मिती सोळुंकेनेच केली आणि स्वतःला प्रसाद लाड असल्याचे भासवून व्यवहार केला. या आरोपांमुळे त्याला चौकशीसाठी बोलावण्यात आले.

सरकारी वकिलांनी जामीन अर्जाला विरोध करताना म्हटले की, सोळुंकेनेच लांडे, वाघमोडे आणि बनकर यांच्यासोबत संगनमत करून हा कट रचला आहे. तरीदेखील न्यायालयाने त्याला अंतरिम जामीन मंजूर केला, कारण त्याचा पूर्वीचा गुन्हेगारी रेकॉर्ड नाही आणि तो जळगाव (Jalgaon) जिल्ह्याचा रहिवासी आहे.