राष्ट्रवादी काँग्रेससाठी एक धक्कादायक बातमी समोर आली आहे. राष्ट्रवादी काँग्रेसचे आमदार माणिकराव कोकाटे यांचे बंधू भारत कोकाटे यांनी आज शिवसेनेत प्रवेश केला आहे. त्यांच्यासोबत त्यांच्या शेकडो समर्थकांनीही शिवसेनेत प्रवेश केला आहे.
शिवसेना प्रमुख उद्धव ठाकरे यांनी भारत कोकाटे यांच्या हाती आज शिवबंधन बांधले आहे. या पक्षप्रवेशाच्या सोहळ्यावेळी उद्धव ठाकरेंनी भाषण केलं. यावेळी उद्धव ठाकरे यांनी कोकाटेंच्या एन्ट्रीने नाशिकमध्ये शिवसेनेची ताकद वाढल्याचं म्हटलं आहे.
राष्ट्रवादीचे आमदार माणिकराव कोकाटे आणि त्यांचे बंधू भारत कोकाटे यांच्यात गेल्या काही दिवसांपासून राजकीय वितुष्ट निर्माण झाले होते. ग्रामपंचायत निवडणुकीत त्यांनी आमदार बंधूविरोधात पॅनेल करून निवडणूक जिंकली, तेव्हापासून त्यांच्यातील वाद अधिक वाढल्याचं समोर आलं.
सोसायटीच्या निवडणुकीत देखील आमदार बंधूला जोरदार टक्कर देऊन घाम फोडला. बंधूंविरोधात आता जमत नसल्याने अखेर भारत कोकाटे यांनी शिवसेनेत प्रवेश करण्याचा निर्णय घेतला. त्यांच्याबरोबर सोनांबेचे सरपंच डॉ. रवींद्र पवार यांनीही शिवसेनेत प्रवेश केला. भारत कोकाटे हे सध्या सोमठाणेचे सरपंच आहेत.
या सोहळ्यात केलेल्या भाषणात उद्धव ठाकरे यांनी बंडखोर आमदांवर पुन्हा एकदा टीका केली. म्हणाले, मला नेत्यांचे फक्त प्रवेश नको आहेत, फोटो नको आहे. मला पक्ष सदस्यांच्या नोंदणीची एवढी प्रतिज्ञापत्रं हवीत की भविष्यात शिवसेनेच्या नादी लागण्याची कोणाची हिंमत झाली नाही पाहिजे. शिवसेनेचा भगवा कुणालाही हिसकावू देणार नाही, असे ठाकरे म्हणाले.
दरम्यान, उद्धव ठाकरेंनी सदस्य नोंदणीच्या केलेल्या आवाहनाला शिवसैनिक प्रचंड प्रतिसाद देत आहेत. सदस्य नोंदणीला प्रतिसाद तर वाढतोय तसेच आमदार-खासदारांच्या बंडानंतरही पक्षामध्ये होत असलेलं इनकमिंग पाहता शिवसेनेची ताकदही वाढत आहे.
