मुख्यमंत्री उद्धव ठाकरे यांच्या निवास्थानाबाहेर हनुमान चालीसा पठण करण्याच्या मुद्यावरून नवनीत राणा आणि रवी राणा यांना अटक करण्यात आली. त्यांच्यावर राजद्रोहाचा गुन्हा दाखल झाला असून, सध्या राणा दाम्पत्य न्यायालयीन कोठडीत आहे. मात्र आता नवनीत राणा यांच्या तब्येतीबाबत एक मोठी बातमी समोर आली आहे.
नवनीत राणा यांची प्रकृती खालावली असून त्यांना जे. जे. रुग्णालयात हलविण्यात आलं आहे. नवनीत राणा यांना स्पॉंडिलायसिसचा आजार आहे. सध्या त्यांचा हा आजार बळावला असल्याचे सांगण्यात येत आहे. ही माहिती नवनीत राणा यांच्या वकिलांमुळे समोर आली आहे.
नवनीत राणांच्या वकिलांनी सोमवारी तुरुंग अधीक्षकांना एक पत्र दिलं होतं. त्यात त्यांनी लिहिले की, नवनीत राणा यांना स्पॉंडिलायसिसचा आजार आहे. तुरुंगात आणले तेव्हापासून त्यांना जमिनीवर झोपायला लावले आहे. त्यामुळे त्यांचा आजार बळावला आहे.
आम्ही अनेकदा तपासणीची मागणी केली. पण, आमच्याकडे दुर्लक्ष कऱण्यात आले. त्यांच्या जीवाला काही झालं तर संपूर्ण जबाबदारी तुरुंगाची असेल. तसेच त्यांनी या अर्जाची प्रत लोकसभा अध्यक्ष ओम बिरला यांना देखील पाठविण्यात आल्याचं सांगितले आहे.
राणांच्या वकिलांनी याआधी देखील नवनीत राणा यांच्या या आजाराबाबत कोर्टात माहिती दिली होती. नवनीत राणांच्या कंबरेचं दुखणं वाढलं असून त्यांना उपचारासाठी गरज आहे, असं वकिलांनी म्हटलं होतं. त्यानंतर आज नवनीत राणा यांना जे. जे. रुग्णालयात हलविण्यात आले आहे.
दरम्यान, राणा दाम्पत्य मातोश्रीबाहेर हनुमान चालिसा वाजविण्याच्या मुद्द्यावरून आक्रमक झाले होते. शिवसैनिकांनी त्यांना त्यांच्या खार येथील निवासस्थानाबाहेर रोखले होते. शेवटी राणा दाम्पत्यांनी अमरावतीला परत जाण्याचा निर्णय घेतला. पण, त्यांना अटक करण्यात आली. त्यांच्यावर राजद्रोहाचा गुन्हा दाखल करण्यात आला.
