‘सैराट’ फेम दिग्दर्शक नागराज मंजुळे (Nagraj Manjule) यांचा पहिलावहिला हिंदी चित्रपट ‘झुंड'(Jhund) शुक्रवारी सिनेमागृहात प्रदर्शित झाला. नागराज यांनी हिंदी सिनेसृष्टीतील पदार्पणातच बॉलिवूडचे महानायक अमिताभ बच्चन यांच्यासोबत काम केले. सध्या हा चित्रपट सर्वत्र चर्चेत आहे, यादरम्यान या चित्रपटात काम करणारे मराठी कलाकार किशोर कदम (Kishor Kadam) यांनी सोशल मीडियावर एक पोस्ट शेअर करत ‘झुंड’ चित्रपटात काम करण्याचा त्यांचा अनुभव सांगितला आहे.
किशोर कदम यांनी फेसबुकवर एक पोस्ट शेअर केली आहे. या पोस्टमध्ये ‘झुंड’ चित्रपटात काम करण्यासोबतच अमिताभ बच्चन यांच्यासोबतही काम करण्याचा अनुभव त्यांनी सांगितला आहे. फेसबुकवर तीन फोटो शेअर करत त्यांनी लिहिले की, ‘यातल्या तिसऱ्या फोटो फ्रेममध्ये अमिताभ बच्चन हा एकच माणूस तुम्हाला दिसत असेल. मलाही तोच दिसतो आहे. तो असेल त्या फ्रेममध्ये आजवर खरं सांगतो कुणीही आणि कितीही माणसं असली तरी मला तोच दिसत आलाय इतका तो माणूस माझ्या मनाच्या पडद्यावर मोठ्ठा कोरला गेलाय’.
‘आजवर मी त्याला दोनदा भेटलो आहे. पहिल्यांदा आयबीएन लोकमत पुरस्कार मिळाला होता तेव्हा आणि आता नागराजच्या ‘झुंड’ च्या सेटवर सतत दहा दिवस. तेव्हाही मी एक फोटो काढला होता त्यासोबत. पण नंतर मी तो कधी पाहायलाच नाही कारण त्यातही मला फक्त तोच दिसत होता’.
‘अमिताभ बोल्तो का रे सेटवर?’, ‘कॅाम्प्लेक्स येतो का रे त्याचा?’, ‘समोरच्याला घाबरवत असेल ना तो?’, ‘काय बोल्लास त्याच्या बरोबर?’ असे अनेक प्रश्न कुणी कुणी विचारतात. आणि त्यांना काय उत्तर द्यावं कळत नाही. जिथे त्या माणसासोबत एकाच फ्रेममध्ये असून मीच माझ्यासाठी इनव्हीजिबल होतो त्या माणसाबद्दल असल्या प्रश्नांना उत्तरं देत बसणं मला फिजूल वाटतं. नागराजमुळे मला या महान माणसासोबत काम करता आलं हे नागराजचे उपकारच’.
https://www.facebook.com/kishorsaumitra.saumitra/posts/2656860494449844
‘काल ‘झुंड’ पाहिला आणि हा माणुस किती ग्रेट ॲक्टर आहे हे पुन्हा एकदा कळलं. आपलं सगळं स्टारडम, अँग्री मॅनची प्रतिमा आणि लोकांनी दिलेलं देवत्व विसरून एका साध्या फुटबॅाल प्रशिक्षकाची भूमिका ज्या ग्रेसफुली हा माणूस करतो त्याला तोड नाही. नागराजसारख्या तीनेक चित्रपटांचा अनुभव असल्या दिग्दर्शकासोबत काम करण्याचा निर्णय हा माणुस घेतो तेव्हा नागराजमधलं इनबॅार्न टॅलेंन्ट कळण्याची क्षमता वर्षानुवर्षांचा अनुभव असल्या माणसालाच असू शकते हे आपल्याला कळतं’.
‘नागराजचा ‘झुंड’ प्रेक्षकांना एक वेगळाच अनुभव देऊ शकतो. एकीकडे अमिताभसारखा अनुभवी नट तर दुसरीकडे नागपूर परिसरातल्या झोपडपट्टी आणि फुटपाथवरली दहाबारा पोरं हे कॅाम्बिनेशन नागराजने ‘फँन्ड्री’, ‘सैराट’, ‘नाळ’ नंतर पुन्हा एकदा यशस्वी करून दाखवलं आहे. अगदी नव्या कोऱ्या आणि रॉ लोकांना घेऊन त्यांच्याकडुन अगदी नैसर्गिक कामं करून घेण्याची कळ नागराजला सापडलीय. त्या साताठ पोरांचं काम बघून नट म्हणून हताश वाटतं. इतकं नैसर्गिक दरवेळी आपल्यालाही करता आलं पाहिजे, असं वाटत राहतं’.
‘या चित्रपटाचं संगीत आणि गाणी हाही प्रचंड विषय होऊ शकतो. अजय-अतुलना सलाम. या चित्रपटाचा एकूण परिघ आणि नागराज स्टाईलमध्ये त्याची गोष्ट सांगण्याची हातोटी हे गणित आता जमून आलंय असं दिसतं. नागराजच्या गोष्टीसोबत भोवतालचा समाज, त्यातले प्रश्न, राजकारण हे त्याला लगडूनच येतं. चित्रपट संपल्यावर एक आशा प्रत्येकाच्या मनांत उमलून येते. सरळ सरळ उपदेशाचे डोस न पाजता प्रेक्षकांसोबत चित्रपटातली पात्र आणि चित्रपट घरपर्यंत येतो. विचार आपसुकच सुरू होतो. एक भान आल्यागत वाटतं’.
‘या चित्रपटाचा एक छोटासा का होइना पण भाग होता आलं याचा आनंद आहेच पण जे काही आहे ते काम अमिताभ बच्चन या ऑरासोबत करता आलं ही एक अविस्मरणीय बाब आयुष्यात जपून ठेवता येईल याबद्दल नागराज आणि संपूर्ण ‘आटपाट’ टीमचा मी खूप खूप आभारी आहे’.
महत्त्वाच्या बातम्या :
ही सध्याच्या पिढीची चूक नाही तर आमच्या पिढीची चूक आहे, भाषेबद्दल जावेद अख्तर यांचे मोठे वक्तव्य
कशी तयार झाली ‘झुंड’ चित्रपटातील फुटबॉल खेळणाऱ्या मुलांची टीम? नागराज मंजुळेंनी सांगितला किस्सा
शाहरुख खान आणि दीपिका पठाणच्या शुटिंगसाठी पोहोचले ‘या’ ठिकाणी, होणार जबरदस्त फाईट
