मध्यंतरी विरोधी पक्षनेते देवेंद्र फडणवीस यांनी विधानसभेत एका स्टिंग ऑपरेशनच्या माध्यमातून आघाडी सरकार वकील प्रवीण चव्हान यांच्या मदतीने भाजपच्या नेत्यांना खोट्या कारस्थानात अडकवण्यासाठी कसे षडयंत्र रचते याचा गौप्यस्फोट केला होता. यावेळी फडणवीसांनी जे व्हिडीओ उपाध्यक्षांकडे जमा केले होते त्यातील काही प्रवीण चव्हान यांच्या ऑफिसमधील संभाषणाचे होती.
परंतु आता एबीपी माझाला दिलेल्या मुलाखतीत प्रवीण चव्हान यांनी फडणवीसांनी केलेले सर्व आरोप फेटाळून लावले आहेत. सोबतच फडणवीसांनी सादर केलेल्या व्हिडीओचे जळगाव कनेक्शन असल्याचा खुलासा चव्हान यांनी केला आहे. जळगावचा तेजस मोरे नामक व्यक्ती माझ्याकडे आला होता. त्यानेच ऑफिसमध्ये एक घड्याळ लावले होते. ज्यात कॅमेरा लपवलेला होता.
अशी माहिती प्रवीण चव्हान यांनी एबीपी माझाला दिली आहे. चव्हान यांनी म्हटले आहे की, “हे सर्व भाजपचे षडयंत्र आहे. चौकशीतुन सर्व काही समोर येईल. फडणवीसांनी पुढे आणलेल्या व्हिडीओमध्ये वाक्यांची मोडतोड करण्यात आली असून सर्व रेकॉर्डिंग समोर येण्याची गरज आहे. महाविकास आघाडीला अडकवण्यासाठी भाजपने हा खेळ रचला आहे.”
त्याचबरोबर, “तेजस मोरे हा तुरुंगात होता आणि जामिन मिळवण्यासाठी माझ्याकडे येत होता. तेजस मोरे हा मूळचा जळगावचा आहे आणि जळगावमधूनच हे सर्व करण्यात आलंय. तेजस मोरेला अनेकांची साथ आहे. मी चालवत असलेल्या केसेसमधे जे आरोपी तुरुंगात आहेत त्यांचीही त्याला साथ आहे. मी कुणाचेही नाव घेतलेले नाही. या प्रकरणाची चौकशी व्हायला हवी.” अशी मागणी चव्हान यांनी केली आहे.
तसेच, या प्रकरणात पुरावे आहेत म्हणून कारवाई होतेय. माझे रेकॉर्डिंग मॅनिप्युलेट करुन वापरण्यात आलं आहे. व्हिडीओ आणि ऑडिओ वेगळे आहेत. वाक्ये अर्धवट वापरण्यात आली आहेत. माझ्या ऑफिसात अशील म्हणून येणाऱ्या तेजस मोरेने हे स्टिंग ऑपरेशन केले आहे. त्यासाठी त्याने समोरच्या काचेच्या भिंतीवर लावायला घड्याळ भेट दिले आणि त्यात छुपा कॅमेरा बसवला असल्याचा संशय चव्हान यांनी व्यक्त केला आहे.
दरम्यान, सुमारे 125 तासांच्या स्टिंग ऑपरेशनमधील महत्त्वाचे भाग फडवीसांनी 29 वेगवेगळ्या पेनड्राईव्हच्या माध्यमांतून सादर केले आहेत. यामध्ये आघाडीने भाजपा नेते गिरीश महाजन यांच्याविरोधात खोटे जाळे रचून त्यांना अडकवण्याचा प्रयत्न कसा केला. याप्रकरणात कोणकोण सहभागी होते. तसेच ड्रग्स प्रकरणात आघाडीने आरोपींचा कसा बचाव केला. याविषयीचे पुरावे फडणवीस यांनी उपाध्यक्षांकडे जमा केले आहेत. या प्रकरणी आता चौकशीचे आदेश देण्यात आले आहेत.
