सध्या राज्यात शिवसेना विरुद्ध भाजप-शिंदे गट यांच्यातील संघर्ष बघायला मिळत आहे. शिवसेना आणि भाजप- शिंदे गट पक्षातील नेते यांच्यातील आरोप-प्रत्यारोपाची मालिका दिवसेंदिवस वाढत आहे. नुकतेच मुंबईतील गटनेत्यांच्या मेळाव्यात शिवसेना प्रमुख उद्धव ठाकरे यांनी भाजपवर निशाणा साधला होता.
मेळाव्यात उद्धव ठाकरे म्हणाले होते, गेल्या काही दिवसांपासून माझ्या घराण्यावरून आणि वंशावरून माझ्यावर टीका होत आहे. मात्र, भाजपच्या तर वंशाचा वाद आहे, असे म्हणत भाजपवर टीका केली. तसेच यावेळी ठाकरे यांनी भाजपवर टीका करताना भाजप प्रदेशाध्यक्ष चंद्रशेखर बावनकुळे यांच्या नावाचा देखील वापर केला.
यावर आता चंद्रशेखर बावनकुळे यांनी उद्धव ठाकरे यांना प्रतिउत्तर दिलं आहे. बावनकुळे यांनी यासंदर्भात ट्विट केले आहे. बावनकुळे म्हणाले की, ‘उद्धव ठाकरे हे वारंवार माझ्या कुळाचा कुत्सितपणे उल्लेख करतात. माझे वडील शेतकरी आहेत. आई- वडिलांनी मोठ्या कष्टातून मला घडविले. केवळ त्यांच्या कष्टाचा, संघर्षाचा वारसा मला मिळाला आहे. दुसरे काही नाही.’
तसेच बावनकुळे म्हणाले ‘गरीब शेतकऱ्याच्या पोटी जन्मास येणे गुन्हा आहे का? माझ्या कुळाचा उद्धार करून उद्धव ठाकरे यांचे नैराश्य दूर होत असेल तर तो माझ्या कुळाचा सन्मानच आहे.’ सध्या त्यांचं हे ट्विट राजकीय वर्तुळात चर्चेचा विषय ठरत आहे.
भाजपामुळे विधानसभा निवडणूक जिंकल्यावर मा. उद्धव ठाकरे तुम्ही मुख्यमंत्रीपदासाठी विश्वासघात केलात. विश्वासघातामुळे तुम्हाला जनतेने वारंवार धडा शिकवलाय. ग्रामपंचायतीत काय झाले पाहा. उरलेला करेक्ट कार्यक्रम महापालिका निवडणुकीत करू.
— Chandrashekhar Bawankule (@cbawankule) September 21, 2022
दरम्यान, मेळाव्यात भाजपवर टीका करताना उद्धव ठाकरे म्हणाले होते की, आज वशंवादावरून माझ्यावर टीका होत आहे. माझ्या घराण्यावर टीका होते आहे. मात्र, मला माझ्या वंशाचा अभिमान आहे. माझ्या घराण्याचा मला अभिमान आहे.
तसेच म्हणाले होते की, संयुक्त महाराष्ट्राच्या लढ्यावेळी संयुक्त महाराष्ट्र समिती फोडणारे हे जनसंघ होते. मात्र, तुमच्या वंशावरूनच वाद आहेत. भाजपाने पक्षात केवळ उपरे भरून ठेवले आहेत की आता तुमचे बावनकुळे की एकशे बावनकुळे हेच कळत नाही आहे, या शब्दात उद्धव ठाकरे यांनी भाजपवर टीका केली होती.
