कबड्डी क्षेत्रातून एक धक्कादायक बातमी समोर आली आहे. कबड्डी सामना सुरू असतानाच एका प्रसिद्ध कबड्डीपटूला भरदिवसा अज्ञातांकडून गोळ्या झाडण्यात आल्या आहेत. त्याच्यावर जवळपास 20 राउंड फायर करण्यात आल्याने परिसरात या घटनेने खळबळजनक वातावरण निर्माण झालं आहे.
संबंधित घटना ही पंजाबमधील जालंधर जिल्ह्यात घडली आहे. सोमवारी 14 मार्च रोजी सामना सुरू असताना काही अज्ञात हल्लेखोरांनी आंतरराष्ट्रीय कबड्डीपटू संदीप नांगल याची गोळ्या घालून हत्या केली. संदीप याच्या डोक्यावर आणि छातीवर जवळपास 20 राउंड फायर करण्यात आले. त्याचे वय वर्ष 35 आहे.
संदीपने एक दशकाहून अधिक काळ कबड्डीवर राज्य केले. तो भारताशिवाय, कॅनडा, अमेरिका आणि युके या देशाकडून देखील खेळला. संदीपला दोन मुल आहेत ती सध्या लंडनमध्ये आहेत. संदीप देखील लंडनमध्ये स्थायीक असून पंजाबमध्ये एका विवाह सोहळ्यासाठी आणि कबड्डी स्पर्धेसाठी तो आला होता. तेव्हाच हा प्रकार घडला.
https://twitter.com/Shehzad_Ind/status/1503397681871273984?t=dHeVF-y9twsmihU1yL-KIw&s=19
संदीपचा समावेश जगातील पाच अव्वल खेळाडूमध्ये होत होता. त्याने कबड्डी वर्ल्डकप स्पर्धेत युकेच्या कबड्डी संघाचे नेतृत्व देखील केले होते. संदीप वरती गोळीबार करण्यात आला तेव्हा, स्पर्धेच्या ठिकाणी मोठ्या प्रमाणात लोक उपस्थित होते. संदीपला गोळ्या घातल्यानंतर एकच खळबळ उडाली. उपस्थित प्रेक्षक जीव वाचवण्यासाठी वाट मिळेल तिकडे पळू लागले.
जालंधर ग्रामीण पोलिस उपाधिक्षक लखविंदर सिंह यांनी दिलेल्या माहितीनुसार,शाहकोट येथील मल्लिया कला गावात एक कबड्डी स्पर्धा सुरू होती. दरम्यान, संदीपवर अज्ञातांनी 8-10 गोळ्या झाडल्या. ही घटना संध्याकाळी 6.15 ते 6.30 दरम्यान घडली. या प्रकरणी पोलिस चौकशी सुरू केली असून त्यांनी अज्ञात व्यक्तीविरुद्ध गुन्हा दाखल केलाय.
अज्ञात हल्लेखोरांनी गोळ्या झाडल्यानंतर उपस्थित लोकांनी संदीपला तात्काळ रुग्णालयात नेलं. पण मोठ्या प्रमाणात रक्तस्राव होत असल्यामुळे संदीपने रस्त्यातच जीव सोडला. लहानपणापासूनच संदीपला कबड्डीची आवड होती. चाहत्यांमध्ये संदीप ग्लेडिएटर नावाने प्रसिद्ध होता. एक दशक संदीपने कबड्डीमध्ये राज्य केले आहे.
