महाराष्ट्र नवनिर्माण सेनेचे अध्यक्ष राज ठाकरे यांनी काही दिवसांपूर्वी उपमुख्यमंत्री अजित पवारांना केंद्रीय तपास यंत्रणाची नोटीस येते पण राष्ट्रवादी काँग्रेस खासदार सुप्रिया सुळेंना का येत नाही? असा सवाल केला होता. यानंतर आता सुप्रिया सुळे यांनी त्यांचे पती सदानंद सुळे यांना आयकर विभागाची नोटीस आल्याचा गौप्यस्फोट केला आहे.
सुप्रिया सुळे सोलापुरात पत्रकारांशी बोलत असताना त्यांनी आपले पती सदानंद सुळे यांना आयकर विभागाची नोटीस आल्याचे सांगितले. याबाबत त्यांनी विस्तृत माहिती दिली नाही. फक्त आयकर विभागाची नोटीस आल्याची माहिती दिली. त्यामुळे ही नोटीस कोणत्या स्वरुपाची आहे, नेमक्या कोणत्या प्रकरणी आहे हे अद्याप स्पष्टपणे सांगता येत नाही.
यावेळी सुप्रिया सुळे म्हणाल्या की, माझ्या नवऱ्याला इन्कम टॅक्सची नोटीस आली आहे. केंद्र सरकारच्या विरोधात तीन भाषणं केल्यानंतर हे घडलं. ज्या दिवशी तिसरं भाषण केलं त्याच दिवशी संध्याकाळी चार वाजता माझ्या नवऱ्याला इन्कम टॅक्सची नोटीस आली, असे सांगितले.
सुप्रिया सुळे यांच्यावर अशी कारवाई होत नाही, असं राज ठाकरे म्हणाल्याचा संदर्भ देत सुप्रिया सुळेंना पत्रकारांनी प्रश्न विचारला असता, त्यांनी राज ठाकरेंचं नाव न घेता उत्तर दिले की, मला कुणाची चूक नाही काढायची. माझा तो स्वभाव नाही. पण अतिशय प्रांजळपणे मी तुम्हाला सांगू इच्छिते की माझ्या भावाच्या घरी कधीच रेड झालेली नाही.
दरम्यान, ठाण्यातील सभेत बोलताना राज ठाकरे यांनी सुप्रिया सुळेंवर टीका केली होती. राज ठाकरे म्हणाले होते की, एकाच घरात राहत असून अजित पवारांना ईडीची नोटीस येते पण सुप्रिया सुळे यांना नोटीस येत नाही. यामागे काय कारण आहे असा सवाल त्यांनी विचारला होता.
सुप्रिया सुळें यांनी पत्रकारांना आपले पती सदानंद सुळे यांच्यावर आयकर विभागाची नोटीस आल्याचे सांगितले, यावर पत्रकारांनी संजय राऊत यांना प्रश्न विचारला. तेव्हा संजय राऊत म्हणाले, आमच्या घरावर या ईडीच्या धाडी पडल्या कारण, आम्ही केंद्र सरकारच्या विरोधात बोललो. अशाप्रकारे राज्य चालत नाही, समोरून लढायला पाहिजे.
