महाराष्ट्र नवनिर्माण सेनेचे अध्यक्ष राज ठाकरे यांनी मशिदींवरील भोंग्यांविरोधात आक्रमक भूमिका घेत, 3 मे पर्यंत महाविकास आघाडी सरकारला मशिदींवरील भोंगे उतरवण्यासाठी डेडलाईनही दिली. यावर आता पॉप्युलर फ्रंट ऑफ इंडिया(पीएफआय) या मुस्लिम संघटनेने मनसेला इशारा दिला, यावर आता मनसेने देखील प्रतिउत्तर दिलं आहे.
राज ठाकरे हे मशिदींवरील भोंग्यांविरोधात आक्रमक झाले असून, त्यांनी 3 मे पर्यंत महाविकास आघाडी सरकारला मशिदींवरील भोंगे उतरवण्यासाठी डेडलाईनही दिली. त्यामुळे आता याचे परिणाम राज्यभर उमटताना दिसत आहेत. अशा स्थितीत पॉप्युलर फ्रंट ऑफ इंडिया अर्थात पीएफआय या मुंब्रामधील एका मुस्लिम संघटनेनं मनसेला इशारा दिला आहे.
पीएफआयचे नेते अब्दुल मतीन शेखानी यांनी म्हटलं, ‘हमको छेडेंगे तो हम छोडेंगे नहीं’ त्यांच्या या वक्तव्याने राजकीय वातावरण अधिकच ढवळून निघाले. पीएफआयच्या इशाऱ्याला आता मनसेकडूनही जोरदार प्रत्युत्तर देण्यात आलं. मनसेचे नेते संदीप देशपांडे यांनी मनसेच्या एका जरी कार्यकर्त्याच्या केसाला धक्का लागला तर महाराष्ट्रभर तांडव करु, असं म्हटलं आहे.
पीएफआयचे नेते अब्दुल मतीन शेखानी यांनी म्हटलं की, काही लोकांना अजानची अडचण होतेय, तर काहींना मस्जिद आणि मदरशांची अडचण होत आहे. ते लोक वातावरण बिघडवण्याचं काम करत आहेत. मात्र आम्हाला शांती हवी आहे.
पीएफआयचा नारा आहे की, हर मजदूर हमारा है. तसेच दुसरा आणखी एक नारा आहे तो म्हणजे, हमको छेडो नहीं, हमको छेडेंगे तो हम छोडेंगे नहीं’ असं पीएफआयचे नेते म्हणाले. तसेच त्यांनी इशारा दिला की, एक मदरसा, एक मस्जिद, एकाही लाऊडस्पीकरवर तुम्ही हात लावण्याचा प्रयत्न केला तर सर्वात पुढे पॉप्युलर फ्रंट ऑफ इंडिया दिसेल.
यावर, मनसेचे नेते संदीप देशपांडे म्हणाले की, मुंबई पोलीस कायद्यातील तरतुदीनुसार तुम्हाला 365 दिवस भोंगे लावता येणार नाहीत. हा कायदा आहे आणि या कायद्याचं पालन व्हावं. जे लोक कायद्याचं पालन न करता आम्हाला धमक्या देत असतील तर त्याची जबाबदारी शासनाची आहे.
शासनाने त्यांच्यावर कारवाई करावी. जर आमच्या एकाही मनसैनिकाच्या केसाला धक्का लागला तर महाराष्ट्रच नाही तर संपूर्ण देशभर तांडव होईल आणि त्याची जबाबदारी शासनाची असेल, असा इशाराही देशपांडे यांनी यावेळी दिला आहे. आता एकीकडे मुस्लिम संघटनाचा इशारा तर दुसरीकडे मनसेची आक्रमकता याला लवकरात लवकर पूर्ण विराम कधी मिळणार हे पाहावं लागेल.
