Rahul Gandhi : लोकसभेतील विरोधी पक्षनेते राहुल गांधी (Rahul Gandhi) यांनी ७ ऑगस्ट रोजी दिल्लीत झालेल्या पत्रकार परिषदेत एक गंभीर आरोप करत निवडणूक आयोग (Election Commission) आणि भारतीय जनता पक्ष (BJP) यांच्यावर संगनमताने निवडणूक चोरण्याचा ठपका ठेवला आहे.
राहुल गांधी यांनी आपल्या सादरीकरणात कर्नाटक (Karnataka) आणि महाराष्ट्र (Maharashtra) या दोन राज्यांमधील मतदार यादीतील अनियमितता समोर आणली. त्यांनी थेट स्क्रीनवर कर्नाटकातील महादेवपूरा (Mahadevapura) मतदारसंघातील यादी दाखवली. यामध्ये एकाच व्यक्तीची नावे अनेक ठिकाणी, डुप्लिकेट नोंदी, चुकीचे पत्ते आणि फोटो नसलेल्या मतदारांची संख्या मोठ्या प्रमाणात असल्याचे त्यांनी नमूद केले.
राहुल गांधींचा दावा
कर्नाटकातील महादेवपूरा (Mahadevapura) मतदारसंघात ६.५ लाख मतदार आहेत, त्यापैकी तब्बल १ लाख मते चोरीला गेली असल्याचा दावा राहुल गांधी यांनी केला. त्यांच्या मते, काँग्रेस (Congress) पक्षाने येथे केलेल्या तपासणीत एकाच पत्त्यावर अनेक मतदारांची नोंद, डुप्लिकेट नावं, आणि बोगस पत्ते आढळले.
राहुल गांधी म्हणाले की, या गैरप्रकारांमुळे काँग्रेसला १६ पैकी केवळ ९ जागा मिळाल्या. उदाहरणादाखल त्यांनी बेंगळुरू सेंट्रल (Bangalore Central) लोकसभा मतदारसंघात भाजपला मिळालेल्या ६,५८,९१५ मतांबरोबर तुलना करत काँग्रेसला मिळालेली ६,२६,२०८ मते दाखवली. दोन्ही पक्षांमध्ये फक्त ३२,७०७ मतांचा फरक होता. परंतु महादेवपूरा विधानसभा मतदारसंघात भाजपला मिळालेल्या १,१४,०४६ मतांची आघाडी संशयास्पद असल्याचे त्यांनी स्पष्ट केले.
महाराष्ट्रात ४० लाख संशयास्पद मतदार
राहुल गांधींच्या मते, महाराष्ट्रात फक्त पाच महिन्यांत ४० लाख गूढ आणि बनावट नावे मतदार यादीत समाविष्ट करण्यात आली आहेत. त्यांनी विचारले की, “हे रहस्यमय मतदार कुठून आले?” त्यांनी असा आरोप केला की, निवडणूक आयोग (Election Commission) आणि भाजप (BJP) यांनी संगनमत करून मतदार यादी बदलून निवडणूक परिणामांवर परिणाम केला.
राहुल गांधी यांनी यावरही प्रश्न उपस्थित केला की, सायंकाळी ५ वाजल्यानंतर मतदानाचा टक्का अचानक वाढतोच कसा? त्यांनी यामागे बोगस मतांची शंका उपस्थित केली.
हरियाणातही पराभव मागे मतदार यादीतील घोटाळा?
राहुल गांधी यांनी हरियाणा (Haryana) राज्यात काँग्रेसचा झालेला पराभवही अशा मतदार यादीतील गोंधळामुळे झाल्याचा आरोप केला.
निवडणूक आयोगाला दोन थेट प्रश्न
मशीन रीडेबल इलेक्ट्रॉनिक डेटा का दिला जात नाही?
राहुल गांधी म्हणाले की, आयोगाकडे वारंवार मागणी करूनही मतदार यादीचा सुसंगत इलेक्ट्रॉनिक डेटा दिला गेला नाही.
बनावट मतदान का थांबवत नाही?
देशात बनावट मतदान (Fake Voting) होत असल्याचे त्यांनी ठामपणे सांगितले. अनेक मतदारांची नावे एकाच पत्त्यावर असून, तीन वेळा मतदान करणारे ११,००० हून अधिक संशयित मतदार असल्याचे त्यांनी उघड केले. काही मतदार यादीतील पत्ते “०” दाखवले गेले होते. काही पत्त्यांवर तब्बल ४६ मतदार असल्याचे निदर्शनास आले.
