एकनाथ शिंदे यांनी बंड केल्यामुळे शिवसेनेला मोठा धक्का बसला आहे. एकनाथ शिंदेंच्या भूमिकेमुळे गेल्या अनेक दिवसांपासून आदित्य ठाकरे आणि खासदार संजय राऊत आक्रमक झाल्याचे पाहायला मिळत आहे. त्यांनी आपल्या भाषणातून बंडखोर आमदारांसाठी अपशब्द देखील वापरले आहेत.
आदित्य ठाकरेंनी बंडखोर आमदारांना वापरलेल्या अपशब्दांमुळे गुवाहाटीमधील बंडखोर आमदार दुखावले गेल्याचे बोलले जात आहे. या पार्श्वभूमीवर आता पाहिल्यांदाच एकनाथ शिंदे यांनी आदित्य ठाकरेंवर निशाणा साधला आहे. त्यांनी ट्विट करत आदित्य ठाकरेंवर हल्लाबोल केला आहे.
एकनाथ शिंदे यांनी ट्विट केले आहे. त्यात लिहिले आहे की, एका बाजूला आपल्या पुत्राने व प्रवक्त्याने वंदनीय बाळासाहेबांच्या शिवसैनिकांना डुकरं, नाल्याचीघाण, रेडा, कुत्रे, जाहील व मृतदेह म्हणायचे, त्यांचा बाप काढायचा तर दुसऱ्या बाजूला मात्र हिंदूविरोधी मविआसरकार वाचवण्यासाठी याच आमदारांना समेटाची हाक द्यायची, याचा अर्थ काय?
एका बाजूला आपल्या पुत्राने व प्रवक्त्याने वंदनीय बाळासाहेबांच्या शिवसैनिकांना डुकरं,नाल्याचीघाण,रेडा,कुत्रे,जाहील व मृतदेह म्हणायचे,त्यांचा बाप काढायचा तर दुसऱ्या बाजूला मात्र हिंदूविरोधी मविआसरकार वाचवण्यासाठी याच आमदारांना समेटाची हाक द्यायची,याचा अर्थ काय?#donttrickmaharashtra
— Eknath Shinde – एकनाथ शिंदे (@mieknathshinde) June 28, 2022
दरम्यान, उद्धव ठाकरेंनी बंडखोर आमदारांना भावनिक साद घातली होती. म्हणाले की, आपण गेल्या काही दिवसांपासून गुवाहाटी येथे अडकून पडलेले आहात. आपल्याबाबत रोज नवीन माहिती समोर येत आहे. आपल्यातील बरेच संपर्कातही आहेत, आपण आजही मनाने शिवसेनेत आहात .
आपल्यापैकी काही आमदारांच्या कुटुंबातील सदस्यांनी देखील संपर्क साधून आपल्या मनातील भावना मला कळवल्या आहेत, आपल्या भावनांचा मी शिवसेनेचा कुटुंबप्रमुख म्हणून आदर करतो. कुटुंबप्रमुख म्हणून तुम्हाला मनापासून सांगतो अजूनही वेळ गेलेली नाही, माझं आपल्याला सगळ्यांना आवाहन आहे, असे उद्धव ठाकरे म्हणाले.
तसेच म्हणाले, आपण या माझ्या समोर बसा , शिवसैनिकांच्या आणि जनतेच्या मनातील संभ्रम दूर करा , यातून निश्चित मार्ग निघेल. आपण एकत्र बसून यातून मार्ग काढू. कोणाच्याही कोणत्याही भूल थापांना बळी पडू नका. शिवसेनेने जो मान सन्मान तुम्हाला दिला तो कुठेही मिळू शकत नाही. समोर आलात बोललात तर मार्ग निघेल.
