Chandrakant Patil on  Eknath Khadse : राज्यभर नगरपरिषद आणि नगरपंचायतींच्या निवडणुकांसाठी मतदानाची प्रक्रिया पार पडली. काही ठिकाणी शांततेत मतदान पार पडले, तर काही भागात मतमोजणीपूर्वीच राजकीय वातावरण तापलेले दिसले. या पार्श्वभूमीवर राजकीय नेते एकमेकांवर जोरदार आरोप प्रत्यारोप करत आहेत.

शिवसेना शिंदे गटाचे आमदार चंद्रकांत पाटील (Chandrakant Patil) यांनी राष्ट्रवादी काँग्रेस शरद पवार गटाचे वरिष्ठ नेते एकनाथ खडसे (Eknath Khadse) यांच्यावर गंभीर आरोप केला आहे. चंद्रकांत पाटील म्हणाले की, एकनाथ खडसे हे सराईत गुन्हेगार असून त्यांनी कोट्यावधी रुपयांचे गौण खनिज जळघावमध्ये चोरले. राज्यातील विविध उच्च पदांवर असताना त्यांच्या दबावामुळे काही गोष्टी समोर आल्या नाहीत.

चंद्रकांत पाटील यांनी आणखी म्हटले की, अंजली दमानिया प्रकरणाशी संबंधित 509 कलमाचा गुन्हा एकनाथ खडसेंवर दाखल आहे. त्यामुळे, लोकांना समजून घ्यावे लागेल की एकनाथ खडसे किती मोठे गुन्हेगार आहेत.

मुक्ताईनगरमध्ये भाजप-शिवसेना राडा

नगरपरिषद निवडणुकीच्या दिवशी मंगळवारी मुक्ताईनगर (Muktainagar) मध्ये भाजप आणि शिवसेना शिंदे गटाच्या कार्यकर्त्यांमध्ये प्रचंड संघर्ष झाला. केंद्रीय राज्यमंत्री रक्षा खडसे (Raksha Khadse) यांनी पोलीस स्टेशनमध्ये जाऊन दावा केला की भाजपच्या कार्यकर्त्याला मारहाण झाली, आणि काही शिवसैनिकांविरुद्ध गुन्हा दाखल केला.

यानंतर बुधवारी आमदार चंद्रकांत पाटील (Chandrakant Patil) यांनीही पोलीस स्टेशनमध्ये जाऊन शिवसेना कार्यकर्त्यांची देखील तक्रार नोंदवावी असे पोलिसांना सांगितले. तसेच, भाजपच्या कार्यकर्त्यांविरोधात गुन्हा दाखल करण्याची मागणी त्यांनी ठामपणे केली.

मतदानाचा विस्तार आणि मतमोजणी

राज्यातील 264 नगरपरिषदा व नगरपंचायतींमध्ये मंगळवारी मतदान झाले. सुधारित निवडणूक कार्यक्रमानुसार 24 नगरपरिषदा आणि नगरपंचायतींच्या अध्यक्षपदांसह सर्व सदस्यपदांसाठी, तसेच 76 नगरपरिषदा व नगरपंचायतींमधील 154 सदस्यपदांच्या जागांसाठी 20 डिसेंबर 2025 रोजी मतदान होणार आहे. सर्व ठिकाणी मतमोजणी 21 डिसेंबर 2025 रोजी सकाळी 10 वाजेपासून सुरू होईल, असे निवडणूक आयोगाने निर्देश दिले आहेत.