ठाण्यातील माजीवाडा मतदार संघावरून मुख्यमंत्री एकनाथ शिंदे आणि एकनाथ शिंदे गटाचे आमदार प्रताप सरनाईक यांच्यात वाद झाला असल्याची राजकीय वर्तुळात चर्चा सुरू आहे. असे असतानाच आता राष्ट्रवादी काँग्रेसने देखील शिंदे गटात मतदारसंघावरून सुरू असलेल्या या वादात उडी घेतली आहे.
ठाणे जिल्ह्यातील ओवळा माजीवाडा, कल्याण पश्चिम आणि अंबरनाथ हे मतदार संघ एकनाथ शिंदे गटाकडे असूनही या मतदारसंघावर भारतीय जनता पक्षाचा डोळा असल्याचा आरोप राष्ट्रवादी काँग्रेसचे प्रवक्ते महेश तपासे यांनी व्यक्त केला आहे.
तसेच या मतदारसंघासाठी भारतीय जनता पक्ष मुख्यमंत्री एकनाथ शिंदे यांच्यावर दबाव टाकत असल्याचा दावाही महेश तपासे यांनी केला आहे. ओवळा माजीवाडा मतदारसंघ बंडखोर आमदार प्रताप सरनाईक यांचा आहे. मात्र हा आणि इतर दोन मतदारसंघ भाजपला हवे असून त्यादृष्टीने भाजप रणनीती आखत आहे, असेही तपासे म्हणाले.
पुढे महेश तपासे म्हणाले, शिवसेनेशी गद्दारी करुन भाजपसोबत संसार थाटलेल्या एकनाथ शिंदे व त्यांच्या बंडखोर आमदारांच्या मतदारसंघावर भाजपची वक्रदृष्टी पडली असल्याने ही धुसफूस वाढत जाईल. शिवाय शिवसेना सोडून चूक केली, असा पश्चाताप त्या आमदारांना करावा लागणार आहे, असा दावाही महेश तपासे यांनी केला आहे.
दरम्यान, केंद्रीय मंत्री अनुराग ठाकूर यांनी ओवळा माजीवाडा आणि आणखी दोन मतदारसंघात भाजपचे मेळावे घेतले होते. त्याचवेळी कल्याण लोकसभा मतदारसंघावर भाजपचा डोळा असल्याच्या चर्चा राजकीय वर्तुळात सुरू झाल्या होत्या.
त्यानंतर आता ओवळा माजीवाडा, कल्याण पश्चिम आणि अंबरनाथ हे तिन्ही मतदारसंघ भाजपला हवे असून त्यात प्रताप सरनाईक यांच्या मतदारसंघाची डील झाल्याने एकनाथ शिंदे व प्रताप सरनाईक यांच्यात धुसफूस सुरू आहे, अशी चर्चा होत आहे.
