आगामी काळात राज्यात महापालिका निवडणूक होत आहेत, त्यामुळे अनेक राजकीय पक्षांनी स्वतः ची रणनीती आणि पुढील धोरणे काय आहेत हे स्पष्ट सांगितले आहे. त्यात भाजप देखील संपूर्ण महाराष्ट्रात कमळ फुलवण्याचं स्वप्न बाळगून आहे. भाजपच्या या स्वप्नामुळे शिंदे गटाची डोकेदुखी वाढली आहे.
भाजपाच्या प्रदेशाध्यक्षपदी चंद्रशेखर बावनकुळे यांची निवड झाल्यापासून संपूर्ण राज्यात भाजपाचे कमळ फुलणार असा दावा केला जात आहे. भाजपने केवळ मुंबईवरच लक्ष केंद्रीत केले असे नाहीतर विदर्भातील अनेक जागांवरही भाजपची नजर राहणार आहे, असे भाजपकडून वारंवार बोललं जात आहे.
त्यात चंद्रशेखर बावनकुळे यांनी बुलढाणा आणि अमरावतीमध्ये केलेल्या विधानाने शिंदे गटाची डोकेदुखी वाढत आहे. त्यांनी अमरावती आणि बुलढाणा या दोन्ही ठिकाणी भाजपचाच खासदार असणार असे सूचक वक्तव्य केले आहे. त्यामुळे भाजपच्या गोठात उत्साह संचारला असला तरी शिंदे गटाचे काय होणार हा प्रश्न अनुत्तरीतच आहे.
बुलढाणा लोकसभा मतदार संघात शिवसेनेचे खासदार हे शिंदे गटात सहभागी झाले आहेत तिथे देखील आगामी खासदार हा भाजपचाच असणार असा दावा बावनकुळे यांनी केला आहे. त्यामुळे प्रतापराव जाधवांचे काय असा प्रश्न आता निर्माण झाला आहे.
बुलढाणा लोकसभा मतदार संघाचे नेतृ्त्व हे प्रतापराव जाधव करीत आहेत जे शिवसेनेतून शिंदे गटात आले आहेत. त्यामुळे, आगामी काळात भाजप आणि शिंदे गट खरोखरच एकत्र लढणार की नाहीत, शिंदे गट आणि भाजप हे एकत्र लढले तरी जागांचा विषय कसा मिटणार हे येणाऱ्या काळात पाहावे लागणार आहे.
दरम्यान, दहीहंडी उत्सवाच्या निमित्ताने चंद्रशेखर बावनकुळे हे अमरावती आणि बुलढाणा येथे दाखल झाले होते. या दरम्यान त्यांनी पंतप्रधान नरेंद्र मोदी यांचे हात मजबूत करायचे असतील तर अमरावती आणि बुलढाणा या मतदार संघात खासदार आणि आमदारही भाजपचाच असणार हे ठणकावून सांगितलं आहे.
