मुख्यमंत्री एकनाथ शिंदे यांच्या बंडखोरीनंतर शिवसेनेला मोठा धक्का बसला. अजूनही शिवसेनेची गळती थांबत नसल्याचं चित्र दिसत आहे. त्यातच आता मुंबईतून शिवसेना नेते आणि खासदार गजानन किर्तीकर आणि आदित्य ठाकरेंचे निकटवर्तीय माजी नगरसेवक अमेय घोले शिंदे गटाच्या वाटेवर असल्याची चर्चा सुरू आहे.
शिवसेना नेते आणि खासदार गजानन किर्तीकर यांनी वर्षा बंगल्यावर मुख्यमंत्री एकनाथ शिंदे यांची सोमवारी भेट घेतली, तर अमेय घोले यांच्या सार्वजनिक गणेशोत्सव मंडळाने मुख्यमंत्री शिंदे यांचे जंगी स्वागत केल्यामुळे ही चर्चा सुरू झाली आहे.
गजानन किर्तीकर शिंदे गटात गेल्यास शिवसेनेला दुहेरी धक्का बसू शकतो. किर्तीकर शिवसेनेच्या स्थानीय लोकाधिकार समितीचे अध्यक्ष आहेत. त्यामुळे किर्तीकर शिंदेंबरोबर गेल्यास शिवसेनेची महत्त्वाची संघटना असलेली स्थानीय लोकाधिकार समितीदेखील शिंदे गटाबरोबर जाऊ शकते.
समिती शिंदे गटात गेल्यावर याचा शिंदे गटाला मोठा फायदा होईल. किर्तीकर जुन्या पिढीतील शिवसैनिक आहेत. ते देखील शिंदे यांच्यासोबत गेल्यास जुन्या शिवसैनिकांमध्ये उद्धव ठाकरे यांच्याविरोधात वातावरण निर्माण होऊ शकते. किर्तीकर हे पक्षाच्या नेतेपदी असल्याने शिवसेना कार्यकारिणीत फूट पडली असल्याचे समोर येईल. त्याचा फायदा शिंदे गटाला नक्कीच मिळू शकतो.
तर दुसरीकडे, अमेय घोले हे मुंबईतील वडाळा भागातील नगरसेवक असून, ते आदित्य ठाकरे यांचे निकटवर्तीय समजले जातात. युवा सेनेच्या कोअर टीममध्येदेखील घोले यांचा समावेश आहे. मात्र, मुख्यमंत्री एकनाथ शिंदे यांनी सोमवारी रात्री उशिरा अमेय घोले यांच्या सार्वजनिक गणेशोत्सव मंडळाला भेट दिली. त्यामुळे चर्चेला उधाण आले.
या चर्चेबाबत अमेय घोले यांना विचारले असता त्यांनी सांगितले की, मी पदाधिकारी असलेल्या सार्वजनिक गणेशोत्सव मंडळाच्या भेटीसाठी मुख्यमंत्री आले होते. राज्यातील संस्कृतीचा भाग म्हणून मी त्यांचे स्वागत केले. आदित्य ठाकरेंचा माझ्यावर विश्वास असून, मी त्यांच्यासोबतच असणार आहे.
