Eknath Shinde: वरळीतील मराठी अस्मिता मेळाव्यानंतर राज ठाकरे (Raj Thackeray) आणि उद्धव ठाकरे (Uddhav Thackeray) यांच्या एकत्र येण्याच्या शक्यतेने महाराष्ट्राच्या राजकारणात मोठी खळबळ निर्माण झाली आहे. या पार्श्वभूमीवर राज्याचे उपमुख्यमंत्री एकनाथ शिंदे (Eknath Shinde) यांनी दिल्लीत जाऊन केंद्रीय गृहमंत्री अमित शाह (Amit Shah) यांची बुधवारी (ता. ९ जुलै) सायंकाळी भेट घेतली. या बैठकीत मुंबई महापालिका निवडणुका (BMC Elections) आणि राज्यातील राजकीय घडामोडी यावर सखोल चर्चा झाल्याची माहिती समोर आली आहे.

ठाकरे बंधूंच्या संभाव्य युतीचे पडसाद

वरळीतील मेळाव्यात राज ठाकरे यांनी थेट युतीची घोषणा केली नसली तरी उद्धव ठाकरे यांच्यासोबत सहकार्याचे संकेत दिले. त्यामुळे मुंबई महानगरपालिकेतील सत्तासमीकरणांवर याचा मोठा परिणाम होण्याची शक्यता निर्माण झाली आहे. महापालिकेचे कोट्यवधी रुपयांचे बजेट, प्रशासकीय महत्त्व आणि मतदारसंघातील ताकद लक्षात घेता, ठाकरे बंधू एकत्र आल्यास भाजप (BJP) आणि शिंदे गटासाठी मोठे आव्हान उभे राहू शकते.

शिंदे-शहा बैठकीत महत्त्वाचे मुद्दे

युतीच्या चर्चांचा आढावा घेण्यासाठी भाजपने खासगी एजन्सीमार्फत सर्वेक्षण करून घेतले असून, त्याचे निष्कर्ष अमित शाह यांनी एकनाथ शिंदे यांच्यासमोर मांडले. या संदर्भात मुंबई महापालिका निवडणुका काही काळासाठी पुढे ढकलण्याचा किंवा तांत्रिक कारणांवर आधारित विलंब करण्याचा प्रस्तावही चर्चेत आला.

शहांचा सल्ला: वक्तव्यांवर नियंत्रण ठेवा

सूत्रांनुसार, अमित शाह यांनी स्पष्ट सूचना दिल्या की, महापालिका निवडणुकांपर्यंत भाजप किंवा शिंदे गटाचे नेते वादग्रस्त वक्तव्ये टाळावीत, एकसंधतेचा संदेश जनतेपर्यंत पोहोचावा. अलीकडील काही मंत्र्यांच्या विधानांमुळे भाजप नाराज असल्याचेही यातून सूचित होते.

त्रिभाषा सूत्रावरून मतभेद

शिक्षण मंत्री दादा भुसे (Dada Bhuse) यांनी त्रिभाषा सूत्र लागू करण्याचा निर्णय घेतल्यावर राज ठाकरे यांनी त्यावर आक्रमक विरोध केला होता. यामुळे शिंदे सरकार आणि मनसे यांच्यात अंतर वाढले. अमित शाह यांनी यावरून शिंदेंकडून माहिती घेतली आणि या मुद्याचाही गांभीर्याने विचार झाल्याचे समजते.

युतीच्या विरोधात पर्याय शोधण्याचा प्रयत्न

जर ठाकरे बंधूंची युती झालीच, तर त्याला तोड देण्यासाठी भाजप-शिंदे गटाने इतर नेत्यांशी संपर्क सुरू केला आहे. हिंदी भाषिक मतदार, मराठी अस्मिता, आणि हिंदुत्वाचा मुद्दा याचा राजकीय फायद्यासाठी उपयोग कसा करता येईल, याचा आढावा घेतला जात आहे.

अधिवेशन सुरू असतानाही शिंदेंचा दिल्ली दौरा

मुंबईत अधिवेशन चालू असतानाही एकनाथ शिंदे यांनी दिल्ली दौरा केल्याने राजकीय वर्तुळात खळबळ उडाली. त्यांनी काही पूर्वनियोजित कार्यक्रम रद्द करून इतर नेत्यांना पाठवले. सुनील प्रभू (Sunil Prabhu) आणि सुमारे ५० नेत्यांच्या बैठकीचाही भाग झाल्याचे बोलले जात आहे.