तर दुसरीकडे जळगाव जिल्ह्यातील चोपडा विधानसभा मतदार संघाच्या शिवसेना आमदार लताबाई चंद्रकांत सोनवणे यांच्या अडचणींमद्धे वाढ झाल्याच पाहायला मिळत आहे. लताबाई सोनवणे यांचे जात प्रमाणपत्र अवैध असल्याचा निर्णय अनुसूचित जमाती प्रमाणपत्र तपासणी समिती यांनी दिला आहे.
आमदार सोनवणे यांनी सादर केलेले उपविभागीय अधिकारी यांनी निर्गमित केलेले टोकरे कोळी, अनुसूचित जमातीचे प्रमाणपत्र रद्द करण्याचे देखील समितीने आदेश केले आहेत. वाचा नेमकं प्रकरण काय आहे? शिवसेना आमदार लताबाई चंद्रकांत सोनवणे यांची आमदारकी का धोक्यात आली?
आमदार लता सोनवणे या अनुसूचित जमाती या प्रवर्गातून निवडून आल्या आहेत. मात्र माजी आमदार जगदीशचंद्र रमेश वळवी यांनी त्यांच्या निवडीला आव्हान दिले आहे. सोनवणे यांचा जातीचा दाखला अवैध असल्याची तक्रार त्यांनी औरंगाबाद खंडपीठाकडे केली होती.
दरम्यान, यावर खंडपीठाने नंदुरबार येथील जात पडताळणी समितीकडे चौकशी करण्याचे आदेश दिले होते. त्यामुळे आमदार लता सोनवणे यांची आमदारकी धोक्यात आली आहे. मुंबई उच्च न्यायालयाच्या औरंगाबाद खंडपीठाने सोनवणे यांची जातवैधता प्रमाणपत्र याचिका फेटाळली आहे. पण तरीही लता सोनवणे यांच्यावर कोणतीही फौजदारी कारवाई करु नये, असं कोर्टाने स्पष्ट केलं आहे.
शुक्रवारी लताबाई चंद्रकांत सोनवणे यांनी जातीच्या दाव्यासंदर्भाने मुंबई उच्च न्यायालयाच्या औरंगाबाद खंडपीठात याचिका दाखल केली होती. मात्र ती याचिका न्या. आर. डी. धनुका व न्या. एस. जी. मेहरे यांनी फेटाळली. दरम्यान, खंडपीठाच्या निर्णयाला आम्ही सर्वोच्च न्यायालयात आव्हान देणार असल्याची माहिती माजी आमदार सोनवणे यांनी माध्यमांशी बोलताना दिली आहे.
