‘धर्मवीर मुक्काम पोस्ट ठाणे’ हा चित्रपट 13 मे रोजी प्रदर्शित झाला. लोकांचा नेता, जननायक अशी ओळख असणाऱ्या धर्मवीर आनंद दिघे यांच्या आयुष्यावर आधारित हा चित्रपट आहे. या चित्रपटाला प्रेक्षकांचा उदंड प्रतिसाद मिळत आहे. तीन दिवसांत या चित्रपटाने केलेली कमाई ऐकून तुमचे डोळे नक्कीच फिरतील.
धर्मवीर: मुक्काम पोस्ट ठाणे’ हा चित्रपट बॉक्स ऑफिसवर घसघशीत कमाई करतोय. प्रवीण तरडे दिग्दर्शित हा चित्रपट 13 मे रोजी प्रदर्शित झाला. पहिल्याच दिवशी चारशेहून अधिक थिएटर्समध्ये ‘धर्मवीर’चे 10 हजारांहून अधिक शोज लावले गेले.
माहितीनुसार, प्रदर्शनाच्या पहिल्याच दिवशी या चित्रपटाने 2.05 कोटी रुपयांचा गल्ला जमवला. तर गेल्या तीन दिवसांत ‘धर्मवीर’ ने 9.59 कोटी रुपये कमावल्याचं कळतंय. रविवारी या चित्रपटाने 3 कोटी रुपयांचा गल्ला जमवला आहे. शिवाय विविध ठिकाणी हाऊसफुल गर्दी जमवण्यात हा चित्रपट यशस्वी ठरला आहे.
ठाणे, कल्याण, बदलापूर, डोंबिवली, पुणे आणि मुंबईतही विविध ठिकाणी अजुनही हाऊसफुल गर्दी आहे. प्रेक्षकांची चित्रपटाला एवढी पसंती मिळत आहे की काही ठिकाणी प्रेक्षक बँड बाजा घेऊन वाजत, गाजत, नाचत थिएटर्सबाहेर पोहोचले. प्रसाद ओकने साकारलेल्या आनंद दिघे यांच्या भूमिकेवर प्रेक्षकांनी आपल्या पसंतीची ठसठशीत मोहोर उमटवली असेच म्हणावं लागेल.
चित्रपटाबद्दल सांगायचे झाल्यास, धर्मवीर मुक्काम पोस्ट ठाणे’ हा चित्रपट शिवसेना नेते आणि बाळासाहेबांच्या अगदी निकटचे शिवसैनिक म्हणून ओळखले जाणारे आनंद दिघे यांच्या जीवनावर आधारित आहे. या चित्रपटाचे दिग्दर्शक प्रवीण दरडे आहेत. यामध्ये आनंद दिघे यांची भूमिका मराठी अभिनेता प्रसाद ओक यांनी साकारली आहे.
चित्रपटात एकनाथ शिंदेंची भूमिका क्षितिज दाते यांनी साकारली आहे. शिवसेनाप्रमुख बाळासाहेब ठाकरे यांची भूमिका मकरंद पाध्ये या अभिनेत्याने साकारली आहे. ज्येष्ठ रंगभूषाकार विद्याधर भट्टे यांनी या चित्रपटातील हे सर्व लूक डिझाईन केले आहेत. सध्या या चित्रपटाला लोकांचा प्रचंड प्रतिसाद मिळत आहे, हा चित्रपट अजून किती कमाई करणारा याकडे सर्वांचे लक्ष आहे.
