‘झुंड’ (Jhund movie) हा चित्रपट सध्या सर्वत्र चर्चेत आहे. चित्रपट प्रेक्षकांच्या पसंतीस उतरत असून नागराज मंजुळे यांनी चित्रपटाच्या माध्यमातून समाजाला एक प्रेरणा दिल्याचे सूर सर्वत्र उमटत आहे. यादरम्यान नुकतीच काही दिवसांपूर्वी अभिनेते किरण माने यांनी ‘झुंड’ चित्रपटाबाबत एक पोस्ट शेअर करत चित्रपट देशभर धुमाकूळ घालणार असे म्हटले होते. त्यानंतर आता त्यांनी दुसरी एक पोस्ट शेअर केली आहे. या पोस्टमध्ये किरण माने यांनी नागराज मंजुळे यांचे भरभरून कौतुक केले आहे.
किरण माने यांनी त्यांच्या फेसबुक पेजवर ही पोस्ट शेअर केली आहे. या पोस्टमध्ये किरण माने यांनी नागराज यांची एक जुनी कविता शेअर केली आहे. ही कविता वाचून ते खूपच भावूक झाले होते, असेही त्यांनी या पोस्टमध्ये म्हटले आहे. नागराज मंजुळे यांनी त्यांच्या कवितेद्वारे समाजातील भीषण वास्तव मांडले होते. तर आता हेच वास्तव त्यांनी चित्रपटाद्वारे सर्वांसमोर आणले. याबाबत नागराज मंजुळे यांचे कौतुक करत किरण माने यांनी ही पोस्ट शेअर केली आहे. त्यांची ही पोस्ट सध्या चर्चेत आहे.
किरण माने यांनी लिहिले की, ‘नागराज, लै लै लै वर्ष झाली. मी खाली पोस्ट केलेली तुझी ‘तुझ्या येण्याअगोदर एक पत्र’ ही कविता वाचून अस्वस्थ झालोवतो. आज या कवितेचं ‘महाकाव्य’ करून तू मोठ्या पडद्यावरुन मांडलंस आणि अख्खा देश हलवून सोडलास.
‘भारतीय सिनेमाच्या दिग्दर्शन, स्क्रीनप्ले संवाद लेखनाच्या सगळ्या रूढ चौकटी मोडून-तोडून तू खूप काही बदलतोयस, सगळी बंधनं झुगारून देऊन तुझ्या मनातलं काहीतरी मांडतोयस… सहजपणे… ‘बघाच आणि समजून घ्याच’ असा आग्रह न करता! या पिढीसाठीही आणि पुढच्या अनेक पिढ्यांसाठी तू ‘प्रेरणा’ ठरणार आहेस. लब्यू भावा’.
या पोस्टसोबत किरण माने यांनी नागराज मंजुळे यांची कविताही पोस्ट केली आहे. ती खालीलप्रमाणे,
‘छत्रपती शिवाजी पुलापर्यंतच
तुझी फोर व्हीलर येऊ शकेल
खाली झोपडपट्टीत अजूनही
एक पाऊलवाटच नाक धरून
उकिरड्यातून वाट काढत खाली येते
पुलावरून पाहशील तेव्हा
महानगरपालिकेच्या सार्वजनिक शौचालयाभोवती
विटक्या पत्र्यांची मान पाठीत रूतलेली
खुजी घरे मोकळ्या आगपेट्यांच्या
ढिगाऱ्यासारखी दिसतील
तुला मन आणि तोल सावरत
खाली यावं लागेल
खाली येशील तेव्हा
चिरकणारे रेकॉर्ड
दारूच्या गुत्त्यावरील कोलमडणारे संवाद
छक्केपंजे, बादशाहबेगमचे रोजचेच विवाद
चारदोन शिव्याही तुझ्या कानी पडतील…कदाचित
शरमू नकोस
फाटक्या कपड्यांतील काही छोटी मुलं
तुला कुतूहलानं पाहत असतील
त्या वाट हरवलेल्या मुलांनाच
माझ्या घराची वाट विचार
तुझ्या अत्तराच्या सुगंधानं चाळ दरवळेल
त्या मुलांच्या मागून तू ज्या वाटेनं येशील
कदाचित त्या वाटेवर मागे चाळ गोळा होईल
बिथरू नकोस
जेव्हा तू मोठी गटार ओलांडून येशील
तेव्हा स्वप्नपूर्ती बिल्डर्सच्या भल्याथोरल्या
होर्डिंगच्या लोखंडी पायाच्या आधारानं
माझं घर उभारलेलं दिसेल
माझ्या दहा बाय दहाच्या घरात येशील तेव्हा
माझ्या भाबड्या आईचं गबाळं स्वागत
बनियान टॉवेलातला मी
आमची कण्हतधुपत पेटणारी चूल
काळाकुळकुळीत चहा
आमचं ऑल इन वन घर
…हे सारं
तुला किळसवाणं वाटल्याची खूण
तुझ्या डोळ्यांत पाहून
मी स्वतःची घृणा करण्यास विवश होईन
तुझं माझ्यावर असीम प्रेम आहे
तुझे ‘डॅड’ मला नवंकोरं भविष्य विकत घेऊन देतील
हे ठिकय… पण
मी माझी घृणा करेन इतपत
मेहरबानी करू नकोस माझ्यावर
माझ्या गरीबखान्यात येऊ नकोस शक्यतो
तू रंगवलेली स्वप्नं इथल्या भूमीत
अंकुरणार नाही
आणि मला बोन्साय होणं मान्य नाही
तू तुझी स्वप्नबीजं घेऊन जा
एक नवी सुपीक जमीन शोध
माझ्या या वांझोट्या भूमीला
कधीतरी दिवस जातीलच
इथेही फुले फुलतील
स्वप्न साकारतील
पण तोवर
मला माझ्या स्वप्नांचं खतपाणी करून
मला स्वतःलाच गाडून घ्यायला हवं
माझ्या या चुरगळलेल्या माणसांसाठी.
https://www.facebook.com/kiran.mane.9047/posts/10224886651501140
महत्त्वाच्या बातम्या :
ब्रेकींग! झुंड चित्रपटाच्या विरोधात न्यायालयात याचिका; निर्मात्याला कोर्टाने ठोठावला १० लाखांचा दंड
नागराज मंजूळेंवर टीका करणाऱ्या शेफाली वैद्यांना नेटकाऱ्यांनी झापलं; म्हणाले, क्यूँ हिला डाला ना…
अमिताभ यांच्यानंतर ‘या’ सुपरस्टारसोबत काम करणार नागराज मंजुळे; म्हणाले, मी खूप दिवसांपासून त्यांच्यासोबत..
