कोण घेणार रतन टाटांची जागा? टाटा सन्सच्या नेतृत्वात बदलाची तयारी सुरू

देशातील सर्वात मोठे औद्योगिक घराणे टाटा समूहाची होल्डिंग कंपनी टाटा सन्स त्याच्या नेतृत्वात आमूलाग्र बदल करू शकते. सूत्रांनी दिलेल्या माहितीनुसार, कॉर्पोरेट कारभार सुधारण्यासाठी कंपनीमध्ये मुख्य कार्यकारी अधिकारी (सीईओ) हे पद निर्माण केले जाऊ शकते.

प्रस्तावित योजनेनुसार, सीईओ 153 वर्षांच्या टाटा समूहाच्या व्यवसायाला मार्गदर्शन करतील, तर अध्यक्ष भागधारकांच्या वतीने सीईओच्या कामगिरीचे निरीक्षण करतील.ब्लूमबर्गने सूत्रांच्या हवाल्याने सांगितले की, नेतृत्व संरचनेत बदल करण्यासाठी टाटा ट्रस्टचे अध्यक्ष रतन टाटा यांची मान्यता महत्त्वाची मानली जाते.

टाटा सन्सचे विद्यमान अध्यक्ष नटराजन चंद्रशेखरन यांचा कार्यकाळ फेब्रुवारीमध्ये संपत आहे परंतु त्यांच्या मुदतवाढीसाठी विचार केला जात आहे. सीईओ पदासाठी टाटा स्टील लिमिटेडसह टाटा समूहाच्या विविध कंपन्यांच्या प्रमुखांची नावे विचारात आहेत. सूत्रांनी दिलेल्या माहितीनुसार, अंतिम निर्णय अद्याप घेण्यात आलेला नाही आणि त्याच्या आराखड्यात आणि तपशिलात बदल होऊ शकतो.

याबाबत टाटा सन्सच्या प्रवक्त्याने प्रतिक्रिया देण्यास नकार दिला. टाटा ट्रस्ट आणि रतन टाटा यांना पाठवलेल्या ईमेलनेही कोणताही प्रतिसाद दिला नाही. टाटा सन्सचे माजी अध्यक्ष सायरस मिस्त्री यांनी टाटा समूहामध्ये गैरव्यवस्थापनाचा आरोप केला होता. बोर्डाने 2016 मध्ये त्यांना काढून टाकले.

मिस्त्री यांनी रतन टाटांविरोधात गुन्हा दाखल केला होता. अनेक वर्षांच्या कायदेशीर लढाईनंतर न्यायालयाने नुकताच टाटांच्या बाजूने निकाल दिला. या निर्णयानंतर काही महिन्यांनी टाटा समूह आपल्या नेतृत्व संरचनेत बदल करण्याचा विचार करत आहे.

टाटा ट्रस्टच्या अध्यक्षपदी रतन टाटा यांची जागा कोण घेणार हे अद्याप स्पष्ट झालेले नाही. टाटा ट्रस्टचा टाटा सन्समध्ये 66 टक्के हिस्सा आहे. टाटा स्टीलवर 10 अब्ज डॉलर्सचे कर्ज आहे तर टाटा मोटर्स सलग तीन वर्षांपासून तोट्यात आहे.

टाटा समुहात टाटा कन्सल्टन्सी सर्व्हिसेस (टीसीएस) च्या रूपात आशियातील सर्वात मोठी सॉफ्टवेअर सेवा कंपनी आहे परंतु ई-कॉमर्स व्यवसायासाठी सुपरअॅप लाँच करण्याच्या त्याच्या योजना अद्याप पूर्ण झाल्या नाहीत.

टाटा समूह 100 पेक्षा जास्त व्यवसाय करतो आणि शेअर बाजारात सूचीबद्ध कंपन्यांची संख्या 2 डझनपेक्षा जास्त आहे. 2020 मध्ये समूहाची एकत्रित वार्षिक कमाई 106 अब्ज डॉलर होती. टाटा समूहाच्या कर्मचाऱ्यांची संख्या 750,000 आहे.

टाटा समूहाचे नेतृत्व बदलण्याची योजना सेबीच्या शिफारशींनुसार आहे. सूत्रांनी दिलेल्या माहितीनुसार, सेबीचे म्हणणे आहे की, देशातील टॉप 500 सूचीबद्ध कंपन्यांच्या चांगल्या कामकाजासाठी, एप्रिल 2022 पर्यंत अध्यक्ष आणि मुख्य कार्यकारी अधिकारी वेगळे असावेत. टाटा सन्स ही सूचीबद्ध कंपनी नसली तरी, या नियमांचे पालन करण्यास हे बदल मदत करतील.

रतन टाटा म्हणतात की ते यापुढे समूहाच्या व्यवसायिक निर्णयांमध्ये सामील नाहीत, परंतु टाटा ट्रस्टच्या माध्यमातून समुहाच्या व्यवस्थापनावर त्यांचा अजूनही मोठा प्रभाव आहे. रतन टाटा 1991 ते 2012 पर्यंत टाटा सन्सचे अध्यक्ष होते.

गेल्या दोन दशकांमध्ये त्यांनी टाटा समूहाला जगाच्या नकाशावर आणण्यात मोलाचे योगदान दिले आहे. या कालावधीत, टाटा समूहाने जग्वार लँड रोव्हर (JLR) 2.3 अब्ज डॉलर्समध्ये विकत घेतले, तर त्याने ब्रिटिश स्टील कंपनी कोरस ग्रुप पीएलसी 13 अब्ज डॉलर्समध्ये विकत घेतली.

Comments are closed, but trackbacks and pingbacks are open.