Vinod Kambli Health Updates: भारतीय क्रिकेट संघाचे माजी फलंदाज विनोद कांबळी (Vinod Kambli) यांची प्रकृती गंभीर आहे, अशी माहिती समोर आली आहे. त्यांना अजूनही नीट बोलता-चालता येत नाही. त्यांच्या प्रकृतीबाबत महत्त्वाची माहिती त्यांच्या भावाने वीरेंद्र कांबळी (Virendra Kambli) यांनी एका प्रॉडकास्टमध्ये दिली. वीरेंद्र म्हणाले की, “विनोद एक चॅम्पियन आहे, तो नक्कीच पुनरागमन करेल. तो पुन्हा चालेल, धावेल आणि कदाचित मैदानावर दिसेल.”

उपचार आणि प्रकृतीची माहिती

वीरेंद्र कांबळी म्हणाले की, विनोद सध्या घरी आहे आणि त्यांची प्रकृती स्थिर आहे, तरी उपचार सुरू आहेत. बोलण्यात अडचण, चालण्यात अडचण आणि अशक्तपणा यामुळे त्यांच्या आरोग्यावर गंभीर परिणाम झाला आहे. “त्याला बरं होण्यासाठी वेळ लागेल, पण तो एक चॅम्पियन आहे,” असेही वीरेंद्र यांनी सांगितले. त्यांनी चाहत्यांना विनोद कांबळीसाठी प्रार्थना करण्याची विनंती केली.

याआधी विनोद कांबळी (Vinod Kambli) यांना युरिन इन्फेक्शन झाले होते. डिसेंबरमध्ये ही समस्या पुन्हा वाढल्यामुळे त्यांना रुग्णालयात दाखल करावे लागले. तपासणीत त्याच्या मेंदूत एक गाठ आढळली होती. उपचार व देखरेखी नंतर त्यांना डिस्चार्ज देण्यात आला होता, तरी प्रकृती अजूनही पूर्ण बरी झालेली नाही.

आजाराचा गंभीर परिणाम

विनोद कांबळींचा आजार अत्यंत धोकादायक आहे कारण त्यांना एकाच वेळी अनेक समस्या आहेत. लघवीचा संसर्ग, पेटके आणि मेंदूत रक्ताच्या गुठळ्या यामुळे मज्जासंस्था आणि मूत्रपिंड कमकुवत झाले आहेत. यामुळे बोलण्यात, चालण्यात अडचण, थकवा आणि अशक्तपणा निर्माण झाला आहे. वेळेवर उपचार न केल्यास मूत्रपिंड निकामी होणे, स्ट्रोक किंवा कायमचे नुकसान होऊ शकते. त्यामुळे हा आजार गंभीर आणि धोकादायक आहे.

विनोद कांबळींची क्रिकेट कारकीर्द

विनोद कांबळी (Vinod Kambli) यांनी 1993 ते 2000 दरम्यान भारतासाठी 17 कसोटी आणि 104 एकदिवसीय सामने खेळले. ते 1000 कसोटी धावा करणारे सर्वात जलद भारतीय फलंदाज आहेत. 17 कसोटी सामन्यात त्यांनी 1084 धावा 54.20 च्या सरासरीने केल्या, यात 4 शतके आणि 3 अर्धशतकांचा समावेश आहे. 104 एकदिवसीय सामन्यात त्यांनी 2477 धावा 32.59 सरासरीने केल्या, यात 2 शतके आणि 14 अर्धशतकांचा समावेश आहे. प्रथम श्रेणी क्रिकेटमध्ये त्यांनी 129 सामने खेळून 9965 धावा 59.67 सरासरीने मिळवल्या, यात 35 शतके आणि 44 अर्धशतकांचा समावेश आहे.

विनोद कांबळी यांचा हा संघर्ष आणि पुनरागमन चाहत्यांसाठी प्रेरणादायी आहे, आणि त्यांना लवकर बरे व्हावे ही सर्वांची प्रार्थना आहे.