Video:  त्रिभाषा धोरणाच्या विरोधात राज्यभरातून जोरदार प्रतिक्रिया उमटल्या. अखेर महाराष्ट्र सरकारने (Maharashtra Government) इयत्ता पहिलीपासून हिंदी सक्तीचा निर्णय रद्द केला. शिक्षण विभागाने (Education Department) यासंदर्भातील दोन्ही शासन निर्णय मागे घेतले असून, प्रसिद्ध अर्थतज्ज्ञ डॉ. नरेंद्र जाधव (Dr. Narendra Jadhav) यांच्या अध्यक्षतेखाली अभ्यास समिती स्थापन करण्याचीही घोषणा केली आहे. या निर्णयाचे सर्वत्र स्वागत होत असतानाच एक व्हिडीओ सध्या सोशल मीडियावर (Social Media) प्रचंड चर्चेत आहे.

व्हिडीओने खळबळ उडवली

संबंधित व्हिडीओत एका अमराठी व्यापारी महिलेला मराठी समाजाला धमकी देताना पाहायला मिळते. ती म्हणते, “आपण दुकाने दोन-चार दिवस बंद ठेवल्यास मराठी लोकांचे लॉकडाऊनसारखे हाल होतील.” तिच्या या वक्तव्यानंतर सभेत उपस्थित असलेल्या व्यापाऱ्यांनी जोरदार टाळ्यांचा कडकडाट केला.

व्हिडीओ मोठ्या प्रमाणावर व्हायरल झाला आहे. सोशल मीडियावर नागरिकांनी तीव्र संताप व्यक्त केला आहे. अनेकांनी या महिलेवर कठोर कारवाई करण्याची मागणी केली आहे. काही नागरिकांनी “बाई, तू दुकान बंद ठेव, आम्ही उपाशी मरण पत्करू पण धमक्या सहन करणार नाही,” अशा प्रतिक्रिया दिल्या आहेत.

विवाद कशामुळे झाला?

हा व्हिडीओ नेमका कुठल्या भागातील आहे, याची अधिकृत माहिती सध्या तरी उपलब्ध नाही. मात्र, काही सूत्रांच्या माहितीनुसार, ही एक व्यापारी सभा होती जिथे स्थानिक व्यापार धोरणं आणि बाजारातील स्पर्धेवर चर्चा सुरू होती. याच वेळी संबंधित महिलेने हिंदी भाषेवरील वादाच्या पार्श्वभूमीवर तीव्र टिप्पणी केली. तिचा हेतू स्पष्ट नसला तरी तिचे बोलणे समाजामध्ये तणाव निर्माण करणारे असल्याने त्यावर संतप्त प्रतिक्रिया उमटल्या आहेत.

मराठी समाजात संतापाची लाट

मराठी भाषा, संस्कृती आणि अस्मितेच्या मुद्द्यावरून गेल्या काही दिवसांपासून वातावरण तापलेले आहे. अशा पार्श्वभूमीवर ही धमकी समाजमनाला दुखावणारी ठरली. अनेक मराठी संघटनांनी यावर तीव्र शब्दात निषेध व्यक्त केला असून प्रशासनाकडून कारवाईची मागणी होत आहे.