Uddhav Thackeray : जम्मू-काश्मीरमधील पहलगाम येथे झालेल्या दहशतवादी हल्ल्याला बारा दिवस पूर्ण झाले असून, देशभरात संतापाचे वातावरण आहे. लष्कराकडून काश्मीरमध्ये सर्च ऑपरेशन सुरू असून, या हल्ल्याशी संबंधित काही गंभीर बाबी आता उघडकीस येत आहेत. तपास यंत्रणा एनआयएच्या हाती असून, या हल्ल्यामागे पाकिस्तानस्थित दहशतवादी गट, आयएसआय आणि पाकिस्तानी लष्कराचा सहभाग असल्याचे प्राथमिक तपासात स्पष्ट झाले आहे.
राजकीय आरोप-प्रत्यारोपही सुरू; देवरा यांचा ठाकरे यांच्यावर हल्लाबोल
या हल्ल्याच्या पार्श्वभूमीवर राजकीय आरोप-प्रत्यारोपालाही उधाण आले आहे. काँग्रेसचे नेते आणि खासदार मिलिंद देवरा यांनी उद्धव ठाकरे यांच्यावर टीकास्त्र सोडले आहे. “भूमीपूत्र ते पर्यटक… उद्धव ठाकरे आणखी किती घसरतील?” असा प्रश्न उपस्थित करत देवरा यांनी ठाकरे यांच्या युरोप दौऱ्यावर जोरदार निशाणा साधला आहे.
ठाकरे कुटुंबीय युरोपमध्ये, शिंदेंची तत्काळ प्रतिक्रिया
हल्ल्यावेळी ठाकरे कुटुंबीय परदेश दौऱ्यावर असून सोशल मीडियावर सक्रिय होते, मात्र त्यांच्या गटाचा एकही खासदार ऑल पार्टी मिटिंगला उपस्थित नव्हता, अशी टीका देवरा यांनी केली. त्याचवेळी मुख्यमंत्री एकनाथ शिंदे यांनी त्वरित प्रतिसाद देत हल्ल्यात अडकलेल्या पर्यटकांना मदत केली, अशी आठवणही त्यांनी करून दिली.
शिंदे, मोदी, शहा यांची तातडीची पावले
हल्ल्यानंतर मुख्यमंत्री शिंदे यांनी जम्मू-काश्मीरमध्ये जाऊन जखमी नागरिकांची भेट घेतली. त्यांनी राज्यातील अडकलेल्या पर्यटकांना सुखरूप परत आणण्यासाठी प्रयत्न केले. दुसरीकडे, केंद्रीय गृहमंत्री अमित शहा यांनीही तातडीने जम्मू-काश्मीरकडे प्रयाण केले. पंतप्रधान नरेंद्र मोदींनी तर विदेश दौरा अर्धवट सोडून देशात परत येण्याचा निर्णय घेतला.
uddhav-thackeray-in-europe-during-pahalgam-attack
