Suresh Kalmadi & Sharad Pawar: पुण्याच्या राजकारणात एकेकाळी अबाधित सत्ता गाजवणारे काँग्रेसचे ज्येष्ठ नेते सुरेश कलमाडी यांचे मंगळवारी वृद्धापकाळाने निधन झाले. पुणे येथील कलमाडी हाऊस या निवासस्थानी त्यांनी अखेरचा श्वास घेतला. वयाच्या ८२व्या वर्षी झालेल्या या निधनाने शहराच्या राजकीय इतिहासातील एक प्रभावी पर्व संपुष्टात आले आहे. दीर्घकाळ आजारपणामुळे ते सक्रिय राजकारणापासून दूर होते आणि गेल्या वर्षभरात त्यांची प्रकृती अधिक खालावली होती.
त्यांच्या आजारपणाच्या काळात राष्ट्रवादी काँग्रेसचे सर्वेसर्वा शरद पवार यांनी रुग्णालयात जाऊन प्रकृतीची विचारपूस केली होती. सप्टेंबर २०२५ मध्ये दीनानाथ मंगेशकर रुग्णालयात झालेली ही भेट अतिशय साधी, पण भावनिक होती. समोर पाहताच “हाऊ आर यू?” असा प्रश्न विचारण्यात आला आणि त्यावर “आय अॅम फाईन” असे उत्तर देत डॉक्टरांकडून तब्येतीची सविस्तर माहिती घेण्यात आली. पुढे कधीही भेट न होऊ शकल्याने हीच भेट अखेरची ठरली, असे राजकीय वर्तुळात बोलले जाते.
केंद्रात काँग्रेसची सत्ता असताना ते केंद्रीय मंत्रिपदावर होते. त्या काळात शहरातील राजकारण त्यांच्या नावाभोवती फिरत असल्याचे चित्र होते. “सबसे बड़ा खिलाड़ी, सुरेशभाई” अशी ओळख निर्माण झालेली असताना दिल्लीपासून पुण्यापर्यंत त्यांचा प्रभाव जाणवत होता. १९९५ ते २००७ या कालखंडात स्थानिक राजकारणात त्यांचे शब्द अंतिम मानले जात. अनेक निर्णय, आघाड्या आणि समीकरणे त्यांच्या भूमिकेवर ठरत असत.
मात्र २०१० साली कॉमनवेल्थ क्रीडा स्पर्धांच्या आयोजनाशी संबंधित भ्रष्टाचाराच्या आरोपांनंतर त्यांच्या राजकीय कारकिर्दीला जबरदस्त धक्का बसला. त्यानंतरचा काळ हा सतत उतरणीचा ठरला. एप्रिल २०२५ मध्ये अंमलबजावणी संचालनालयाकडून सादर झालेल्या क्लोजर रिपोर्टनंतर निर्दोष ठरवण्यात आले, तरीही सक्रिय राजकारणात पुनरागमन घडू शकले नाही. आरोग्याच्या कारणांमुळे ते पूर्णपणे बाजूला राहिले.
आज दुपारी दोन वाजेपर्यंत पार्थिव अंत्यदर्शनासाठी निवासस्थानी ठेवण्यात येणार आहे. त्यांच्या जाण्याने केवळ एका व्यक्तीचा नव्हे, तर पुण्याच्या राजकीय इतिहासातील एका प्रभावी अध्यायाचा अंत झाल्याची भावना सर्वत्र व्यक्त होत आहे.
