Solapur Crime:  सोलापूर जिल्ह्यातील (Solapur District) बार्शी तालुक्यातील सासुर गावात (Sasur Village) घडलेल्या घटनेने संपूर्ण परिसर हादरला आहे. मंगळवारी सकाळी एका कारमध्ये माजी उपसरपंच गोविंद बर्गे (Govind Barge) यांचा मृतदेह सापडला. प्राथमिक तपासात त्यांनी स्वतःच्या पिस्तुलाने गोळी झाडून जीवन संपवल्याचे समोर आले. मात्र या धक्कादायक निर्णयामागे एका नर्तिकेशी असलेले संबंध आणि पैशांसाठी झालेला दबाव कारणीभूत ठरल्याची माहिती पुढे आली आहे.

प्रेमसंबंध आणि पैशांची मागणी

2024 मध्ये धाराशिव जिल्ह्यातील (Dharashiv District) एका कला केंद्रात (Kala Kendra) गोविंद यांची ओळख पूजा गायकवाड (Pooja Gaikwad) या नर्तिकेशी झाली. ही ओळख पुढे प्रेमप्रकरणात बदलली. या नात्यात असताना पूजाने वेळोवेळी त्यांच्याकडून मोबाईल, सोने, रोख रक्कम आणि अगदी जमीनही घेतली. तपासात समोर आलं की, तिने जवळपास दोन लाखांचा मोबाईल फोनही मागून घेतला होता.

मात्र अलीकडेच तिने अधिक दबाव आणायला सुरुवात केली. गेवराई तालुक्यातील (Georai Taluka) बंगल्याची मालकी हक्क आपल्या नावावर करण्याची आणि भावाच्या नावावर पाच एकर शेती लिहून देण्याची मागणी तिने केली. यासाठी ‘‘मान्य केलं नाही, तर बलात्काराचा गुन्हा दाखल करीन’’ अशी थेट धमकी दिल्याचे नातेवाईकांनी सांगितले. या दबावामुळे मानसिक त्रस्त होऊन गोविंद यांनी आत्महत्येचं टोकाचं पाऊल उचलल्याचा अंदाज पोलिस तपासात व्यक्त करण्यात आला आहे.

पोलिसांत गुन्हा दाखल

या घटनेनंतर पोलिसांनी तातडीने चौकशी सुरू केली. मृताचे मेहुणे लक्ष्मण चव्हाण (Laxman Chavan) यांनी दिलेल्या फिर्यादीवरून पूजा देविदास गायकवाड हिच्याविरोधात आत्महत्येस प्रवृत्त केल्याचा गुन्हा नोंदवण्यात आला आहे. पोलिसांनी या प्रकरणाचा तपास आत्महत्या आणि खून या दोन्ही शक्यतांच्या दृष्टीने सुरू केला आहे.

गावात खळबळ, संशय कायम

गोविंद बर्गे हे गेवराई तालुक्यातील लुखामसला गावात (Lukhamasla Village) प्लॉटिंग व्यवसाय करत होते. सोमवारी रात्री ते पूजाच्या घरी गेले होते. मात्र दुसऱ्या दिवशी सकाळी गावाबाहेर कारमध्ये त्यांचा मृतदेह सापडताच परिसरात एकच खळबळ उडाली. प्रेमातून निर्माण झालेला वादच या शोकांतिकेचं कारण असल्याचं बोललं जात आहे. तरीदेखील पूजाची भूमिका आणि या प्रकरणाचा सखोल तपास सुरू आहे.

पूजा गायकवाड कोण आहे?

पूजा गायकवाड ही कला केंद्रात नृत्य करणारी कलाकार असून वयाच्या 21 व्या वर्षी ती चर्चेत आली आहे. तिच्या इन्स्टाग्रामवर अनेक नृत्याचे व्हिडिओ आणि रिल्स असल्याने ती सोशल मीडियावर सक्रिय आहे. दीड वर्षांपूर्वी तिची गोविंद यांच्याशी ओळख झाली आणि पुढे संबंध प्रस्थापित झाले. संबंधाच्या काळात तिला महागडे मोबाईल, सोन्याचे दागिने आणि इतर वस्तू मिळाल्या होत्या. अलीकडेच झालेला तणाव आणि पैशांसाठीचा दबाव यामुळे हे प्रकरण दुर्दैवी शेवटाला पोहोचले आहे.