केरळ। देशात कोरोनाने धुमाकूळ घातला आहे. दिवसेंदिवस कोरोनाबाधित रुग्ण संख्येत लक्षणीय वाढ होत आहे. या महामारीमुळे देशातील शैक्षणिक वेळापत्रक कोलमडून पडले आहे. अनेक परीक्षा रद्द करण्यात आल्या आहेत.
विद्यार्थ्यांचे आरोग्य लक्षात घेऊन काही परीक्षा पुढे ढकलण्यात आल्या आहेत. मात्र, केरळमध्ये घेण्यात आलेल्या अभियांत्रिकी व वैद्यकीय प्रवेश पूर्व परीक्षेत काही विद्यार्थ्यांना कोरोनाची लागण झाल्याची धक्कादायक माहिती समोर आली आहे.
सोशल डिस्टन्सिंगच्या नियमाचा भंग केल्याप्रकरणी जवळपास ६०० विद्यार्थ्यांच्या पालकांवर गुन्हे दाखल केले आहेत. केरळमध्ये अभियांत्रिकी, वास्तुस्थापत्य (आर्किटेक्चर), वैद्यकीय प्रवेश पूर्व परीक्षा घेण्यात आली.
परीक्षेला उपस्थित असलेला एक १७ वर्षीय विद्यार्थी बुधवारी कोरोना पॉझिटिव्ह निघाला. तर मंगळवारी दोन विद्यार्थी कोरोना पॉझिटिव्ह निघाले होते. दरम्यान, केरळ पोलिसांनी परीक्षेला बसलेल्या ६०० विद्यार्थ्यांच्या पालकांवर गुन्हे दाखल केले आहेत.
कोरोनाचा वाढता प्रसार लक्षात घेऊन अनेक राज्यांनी शैक्षणिक वर्षही उशिराने सुरू करण्याचा निर्णय घेतला आहे. केंंद्रीय मनुष्यबळ विकास मंत्रालयाने देखील काही परीक्षा पुढे ढकलल्या आहेत.
विशेषतः महाराष्ट्रातील काही शहरांमध्ये कोरोनाच्या वाढत्या प्रादूर्भावामुळे परिस्थिती चिंताजनक आहे. त्यामुळे राज्य सरकारने ऑनलाईन शैक्षणिक वर्ष सुरू करण्यास सुरूवात केली आहे.
तर अंतिम वर्षाच्या परीक्षांचा निर्णय अजून निश्चित झालेला नाही. विद्यापीठ अनुदान आयोगाने याविषयी सुधारित मार्गदर्शक सूचना जारी केल्या आहेत. परंतु राज्य सरकार मात्र, परीक्षा न घेण्याच्या भूमिकेवर ठाम असल्याचे दिसत आहे.
