Santosh Dhuri on Raj Thackeray: मनसेचे माजी नगरसेवक संतोष धुरी (Santosh Dhuri former) यांनी मंगळवारी भाजप (Bharatiya Janata Party India) मध्ये प्रवेश करताच राजकीय वर्तुळात मोठी खळबळ उडाली. गळ्यात भाजपचा गमछा घालून पहिल्याच पत्रकार परिषदेत त्यांनी राज ठाकरे (Raj Thackeray) आणि उद्धव ठाकरे (Uddhav Thackeray) यांच्यावर थेट आणि जहरी टीका केली. “मनसेचा पक्ष पूर्णपणे सरेंडर करण्यात आला असून आता त्याचा ताबा दुसऱ्यांच्याच हातात आहे,” असा घणाघाती आरोप त्यांनी केला.
मुंबई महापालिका निवडणुकीच्या (BMC Election 2026 Mumbai) पार्श्वभूमीवर बोलताना त्यांनी मनसेसोबत झालेल्या जागावाटपावरही गंभीर आक्षेप घेतला. मराठी माणसांचा प्रभाव असलेल्या भागांत पक्षाला दुय्यम वागणूक देण्यात आल्याचा दावा करत, “ज्या जागांवर दुसऱ्या पक्षाकडे उमेदवारच नव्हते किंवा बदनामी झाली होती, त्याच जागा मनसेच्या वाट्याला टाकण्यात आल्या,” अशी खंत त्यांनी व्यक्त केली.
धुरी यांच्या म्हणण्यानुसार, मुंबईत मनसेसाठी 52 जागा सोडल्याचं चित्र उभं केलं जात असलं, तरी प्रत्यक्षात त्यातील सात-आठ जागांवरही विजयाची शाश्वती नाही. माहीम, दादर, वरळी, शिवडी, भांडूप यांसारख्या मराठीबहुल परिसरांत पक्षाला मुद्दाम दुय्यम स्थान देण्यात आलं. जिथे मनसेचा नैसर्गिक प्रभाव होता, तिथेच संधी नाकारण्यात आल्याचा आरोप त्यांनी केला.
जागावाटपाच्या चर्चेदरम्यान प्रत्येक विधानसभा मतदारसंघात किमान दोन जागा देण्याचं ठरलं होतं. मात्र दादरमधील महत्त्वाचे वॉर्ड अखेर दुसऱ्याच पक्षाच्या वाट्याला गेले. या निर्णयप्रक्रियेत आपल्याला किंवा पक्षातील काही प्रमुख नेत्यांना विश्वासात न घेतल्याची सल त्यांनी व्यक्त केली. “मला उमेदवारी न मिळाल्याचा राग नाही, पण पक्षाच्या ताकदीचे किल्लेच सरेंडर करण्यात आले,” असा गंभीर आरोप त्यांनी केला.
धुरी यांनी दावा केला की, वरच्या पातळीवर झालेल्या ‘तह’नुसार काही नेत्यांना पूर्णपणे बाजूला काढण्याचा आदेश देण्यात आला होता. त्यामुळे मनसेची स्वायत्त ओळख संपुष्टात येत चालल्याची भावना त्यांनी बोलून दाखवली. “पक्षावर प्रेम असलेल्यांना बाहेर काढून, तडजोडीचं राजकारण लादलं गेलं,” असं म्हणत त्यांनी आपल्या भाजप प्रवेशाचं समर्थन केलं.
