Sanjay Raut: ठाकरे गटातील जेष्ठ नेते आणि राज्यसभा सदस्य संजय राऊत (Sanjay Raut) गेल्या काही आठवड्यांपासून गंभीर तब्येतीच्या समस्येमुळे पूर्णपणे सार्वजनिक जीवनापासून दूर होते. डॉक्टरांनी दिलेल्या कडक निर्देशांनुसार, गर्दीत जाणे, बाहेर पडणे आणि राजकीय कार्यक्रमांपासून दूर राहणे त्यांना बंधनकारक करण्यात आले होते. 31 ऑक्टोबरला त्यांनी स्वतः पत्र प्रसिद्ध करून तब्येतीमुळे किमान दोन महिने कोणत्याही सार्वजनिक उपक्रमात सहभागी न होण्याचा निर्णय जाहीर केला होता. त्यानंतर त्यांच्यावर रुग्णालयात उपचारही झाले आणि काही दिवसांपूर्वी ते घरी परतले. डॉक्टरांनी विश्रांतीचा सल्ला दिल्यामुळे ते घरातून बाहेर पडत नव्हते.

मात्र, सोमवारी बाळासाहेब ठाकरे (Balasaheb Thackeray) यांच्या स्मृतीदिनी, आपल्या लाडक्या नेत्याला अभिवादन करायचं आतून उमटलेलं आवाहन रोखू न शकल्यामुळे संजय राऊत घराबाहेर पडले. चेहऱ्यावर मास्क, साधा शर्ट-पँटचा पेहराव आणि तब्येतीच्या अडचणी असूनही त्यांनी दादरच्या शिवाजी पार्कमधील स्मृतीस्थळ गाठलं. गाडीतून उतरताना त्यांच्या सोबत त्यांच्या भावाने सुनील राऊत यांनी हात देऊन साथ दिली. राऊत हे थेट चालत स्मारकापर्यंत गेले आणि शांतपणे बाळासाहेबांना वंदन केले. काही क्षण ते स्मारकाजवळ उभे राहून आठवणींमध्ये तल्लीन झाल्याचेही उपस्थितांना जाणवले.

राऊतांचा राजकीय प्रवास आणि सध्याची परिस्थिती

2019 मधील सत्तेच्या नाट्यानंतर महाराष्ट्रात महाविकास आघाडीचं सरकार स्थापन व्हावं यासाठी संजय राऊत यांनी मोठी भूमिका पार पाडली होती. उद्धव ठाकरे मुख्यमंत्री झाल्यानंतर ते दररोज पत्रकार परिषद घेत विरोधकांना जोरदार उत्तर देत राहिले. एकनाथ शिंदे यांनी बंड पुकारल्याने शिवसेना दोन गटात विभागली; अनेक आमदार आणि खासदार शिंदे गटात गेले, मात्र राऊत यांनी शेवटपर्यंत उद्धव ठाकरे यांच्यासोबत उभं राहणं पसंत केलं. त्यामुळे ते ठाकरे गटाचे मुख्य रणनीतीकार बनले.

परंतु मुंबई महानगरपालिका निवडणुकीच्या पार्श्वभूमीवर अचानक आजारपणाची लागण झाल्याने त्यांना सक्तीची विश्रांती घ्यावी लागली. यामुळे त्यांच्या सक्रिय भूमिकेला ब्रेक बसला असला तरी त्यांच्या पुनरागमनाची अपेक्षा त्यांच्या समर्थकांमध्ये कायम आहे.

 “मी लवकरच परत येईन” – राऊतांचे पत्र

31 ऑक्टोबरला जाहीर केलेल्या पत्रात त्यांनी सांगितलं: “आपल्या सगळ्यांचं प्रेम आणि विश्वास माझ्यावर आहेच. परंतु अचानक प्रकृतीत गंभीर बिघाड आल्याने मला काही काळ सार्वजनिक जीवनापासून दूर राहावं लागत आहे. वैद्यकीय सल्ल्यानुसार बाहेर जाण्यावर निर्बंध घालण्यात आले आहेत. मात्र मी यातून लवकर बाहेर पडेन आणि नवीन वर्षात पुन्हा आपल्यासमोर येईन. माझ्यावरील आपली माया अशीच राहू द्या.” त्यांचे हे शब्द वाचून अनेक कार्यकर्ते भावूक झाले होते.