Ramdas Kadam on Balasaheb Thackeray: दसरा मेळाव्यात केलेल्या वक्तव्यामुळे चर्चेत आलेले रामदास कदम (Ramdas Kadam) आता बचावात्मक भूमिकेत दिसत आहेत. शिवसेना शिंदे गटाचे हे ज्येष्ठ नेते बाळासाहेब ठाकरे (Balasaheb Thackeray) यांच्या निधनानंतर त्यांच्या पार्थिवावरून गंभीर आरोप करताना म्हणाले होते की, “त्यांच्या हाताचे ठसे घेतले गेले.” या विधानाने राजकीय वर्तुळात मोठी खळबळ उडाली होती. मात्र आता कदम यांनी स्वतःच्या वक्तव्यावरून मागे हटत स्पष्ट केले की, “बाळासाहेब आमचे दैवत आहेत, त्यांची बदनामी होईल असं काही मी बोललो नाही.”
कदम यांनी पत्रकार परिषदेत म्हटलं, “मी फक्त एक संशय व्यक्त केला होता. उद्धव ठाकरे (Uddhav Thackeray) यांनी सांगितलं होतं की, छत्रपती शिवाजी महाराजांचे पायाचे ठसे घेतले जातात, त्याचप्रमाणे आमचे दैवत म्हणून बाळासाहेबांचे हाताचे ठसे घेतले असतील, तर त्यात काही वाईट नाही. पण काही लोकांना वाटतं की मी ते स्विस बँकेसाठी बोललो – हा पूर्णपणे गैरसमज आहे. बाळासाहेबांविषयी माझ्या मनात कधीही चुकीचा विचार येऊ शकत नाही.”
त्यांनी पुढे सांगितलं, “हा विषय इथंच संपला. मी कधीच त्यांच्या प्रतिष्ठेला धक्का पोहोचेल असं काही बोलणार नाही. आमच्यासाठी बाळासाहेब म्हणजे देव आहेत.” या वक्तव्याने त्यांनी पूर्वीच्या आरोपांवर पडदा टाकत आपली भूमिका सौम्य केली आहे.
दरम्यान, पुण्यातील गुंड निलेश घायवळ (Nilesh Ghaywal) याचा भाऊ सचिन घायवळ (Sachin Ghaywal) याला पोलिसांचा अहवाल डावलून शस्त्र परवाना देण्यात आल्याच्या प्रकरणावरून ठाकरे गटाचे आमदार अनिल परब (Anil Parab) यांनी गृहराज्यमंत्री योगेश कदम (Yogesh Kadam) यांच्या हकालपट्टीची मागणी केली आहे.
या पार्श्वभूमीवर रामदास कदम यांनी मोठा गौप्यस्फोट केला. ते म्हणाले, “मी योगेश कदमला विचारलं असता त्याने सांगितलं की, ही शिफारस एका उच्च पदावर बसलेल्या व्यक्तीने केली होती. ती व्यक्ती न्यायाधीशासारखीच आहे आणि विधिमंडळात मंत्र्यांनाही आदेश देऊ शकते. त्यामुळे ती शिफारस पाहता परवाना देण्यात आला.”
यानंतर कदम यांनी अप्रत्यक्षपणे विधानपरिषद सभापती राम शिंदे (Ram Shinde) यांच्याकडे बोट दाखवलं. त्यांनी म्हटलं, “मुख्यमंत्री एकनाथ शिंदे (Eknath Shinde) यांच्याकडे त्या व्यक्तीचं नाव पाठवण्यात आलं होतं. त्यामुळे आता राम शिंदे या आरोपावर काय उत्तर देतात, हे पाहणं महत्त्वाचं ठरणार आहे.”
राजकीय वर्तुळात आता चर्चा रंगली आहे की, कदम यांनी केलेल्या या वक्तव्यामुळे शिंदे गटावर दबाव वाढू शकतो का, आणि ठाकरे गट याचा राजकीय फायदा घेईल का.
