Raj Thackeray & Uddhav Thackeray: महाराष्ट्रातील राजकारणात येत्या दसऱ्याच्या मेळाव्याच्या निमित्ताने मोठी राजकीय घडामोड घडण्याची शक्यता वर्तवली जात आहे. यंदाच्या शिवतीर्थावर होणाऱ्या दसरा मेळाव्यात उद्धव ठाकरे (Uddhav Thackeray) यांच्यासोबत मनसेप्रमुख राज ठाकरे (Raj Thackeray) स्टेजवर दिसण्याची शक्यता व्यक्त केली जात आहे. यासंदर्भातील संकेत सचिन अहिर (Sachin Ahir) यांनी दिल्याने चर्चेला जोर चढला आहे.
सचिन अहिर यांचे वक्तव्य
शनिवारी ‘एबीपी माझा’शी संवाद साधताना सचिन अहिर म्हणाले, “दसऱ्याला तुम्हाला चांगली बातमी मिळेल. कदाचित राज ठाकरे यांना शिवसेनेकडून दसरा मेळाव्याचे निमंत्रण जाऊ शकते.” ते मुंबईतील ‘एबीपी माझा’च्या न्यूजरूममध्ये गणेशोत्सवानिमित्त दर्शनासाठी आले होते. त्यावेळी दिलेल्या मुलाखतीत त्यांनी ठाकरे बंधूंच्या एकत्र येण्याच्या शक्यतेवर भाष्य केले.
ठाकरे बंधूंच्या मिलनाची गरज
सचिन अहिर यांच्या मते, उद्धव आणि राज ठाकरे यांचे एकत्र येणे हे केवळ दोन पक्षांसाठीच नव्हे, तर संपूर्ण राज्यासाठी गरजेचे आहे. लोकांच्या मनातही हीच भावना असल्याचे ते म्हणाले. गणेशोत्सव संपल्यानंतर पितृपक्ष सुरु होत आहे आणि त्यानंतर दसरा सण आल्यावर ही चांगली बातमी मिळेल, अशी आशा व्यक्त करण्यात आली.
दसरा मेळाव्याचं महत्त्व
शिवतीर्थावरील दसरा मेळावा हा नेहमीच राजकीय दृष्ट्या महत्त्वाचा मानला जातो. या व्यासपीठावरून कार्यकर्त्यांना दिशा दिली जाते. सध्याच्या परिस्थितीत काय भूमिका घ्यायची, हे याच मेळाव्यातून ठरतं. यंदाचा मेळावा “न भूतो न भविष्यती” असेल, असा दावा सचिन अहिर यांनी केला.
मुंबई महापालिका निवडणुकीची पार्श्वभूमी
मुंबईची भौगोलिक आणि सामाजिक परिस्थिती बदलत चालली आहे. त्यामुळे येणारी मुंबई महानगरपालिकेची निवडणूक ही मराठी माणसासाठी अस्तित्वाची लढाई असेल, असेही अहिर यांनी स्पष्ट केले. ते म्हणाले, “मी 15 वर्षे काँग्रेस-राष्ट्रवादीसोबत होतो, पण कधीही शिवसेना नसावी असे वाटले नाही. खरं तर मुंबई महापालिका चांगली चालवण्याची क्षमता फक्त शिवसेनेकडेच आहे.”
अहिर यांनी स्पष्ट केलं की, मुंबईत मराठी माणूस टिकवायचा असेल तर उद्धव आणि राज ठाकरे या दोघांनी एकत्र येऊन नेतृत्व करणे ही काळाची गरज आहे. दोन्ही भाऊ कायम एकमेकांकडे पाहत असतात आणि दोघेही एकमेकांना आमंत्रित करू शकतात, असं ते म्हणाले.
