Prakash Ambedkar on Pune Dalit Girls: पुणे (Pune) शहरातील कोथरुड पोलीस ठाण्यात तीन दलित तरुणींवर पोलिसांकडून छळ केल्याचा धक्कादायक प्रकार उघड झाला आहे. रविवारी ही माहिती समोर आल्यानंतर तब्बल २४ तास उलटून गेले, तरीही स्थानिक पोलिसांनी या प्रकरणी कोणताही एफआयआर दाखल केला नाही. रविवारी रात्री खासदार रोहित पवार (Rohit Pawar), समाजसेविका सुजात आंबेडकर (Sujata Ambedkar), अंजली आंबेडकर (Anjali Ambedkar) आणि अनेक सामाजिक कार्यकर्त्यांनी पुणे पोलीस आयुक्तालयात ठाण मांडून न्यायाची मागणी केली. पहाटे साडेतीनपर्यंत वरिष्ठ पोलीस अधिकाऱ्यांशी चर्चा झाली, मात्र गुन्हा नोंदवण्यास पोलिसांचा ठाम नकार कायम राहिला.

यामुळे वंचित बहुजन आघाडीचे नेते प्रकाश आंबेडकर (Prakash Ambedkar) संतप्त झाले. त्यांनी पोलिस अधिकाऱ्यांपैकी कदम (Kadam) नावाच्या अधिकार्‍याला थेट फोन लावून जाब विचारला.

“दोन दिवस नाही, ताबडतोब…”

फोनवरील संभाषणात संबंधित अधिकारी म्हणाले की, “एक-दोन दिवसांत एफआयआर दाखल करू.” यावर आंबेडकरांनी संताप व्यक्त करत सांगितले, “कदम, ती मुलगी फक्त २५ वर्षांची आहे. औरंगाबादहून (Aurangabad) आलेला एखादा पोलीस तिच्या घरात घुसतो, हा कोणत्या कायद्याचा भाग आहे? पोलिसांना असा परवाना आहे का? लगेच मुलींच्या तक्रारीनुसार एफआयआर नोंदवा आणि मग तपास करा. दोन दिवस थांबण्याचा प्रश्नच नाही. कायदा हा कायदाच आहे, सर्वोच्च न्यायालयाने स्पष्ट निर्देश दिले आहेत. जर तुम्ही एफआयआर नोंदवणार नसाल तर आंदोलनाचा मार्ग अवलंबू.”

औरंगाबाद पोलिस अधिकाऱ्याच्या प्रभावाचा गैरवापर?

या घटनेचा धागा एका विवाहित महिलेपर्यंत जातो, जी पतीच्या अत्याचाराला कंटाळून पुण्यात आली होती. तिला मदत करण्यासाठी तीन महिला सामाजिक कार्यकर्त्या पुढे आल्या आणि ‘वन स्टॉप सखी सेंटर’मध्ये दाखल केले. महिलेचा एक नातेवाईक औरंगाबादमधील निवृत्त पोलीस अधिकारी असल्याची माहिती आहे. त्याने आपल्या पदाचा गैरवापर करत पुणे पोलिसांची मदत घेतल्याचा आरोप करण्यात येतो.

यानंतर कोथरुड पोलिसांनी कोणताही वॉरंट न घेता या तिन्ही महिलांच्या घरात मध्यरात्री प्रवेश केला आणि त्यांना ताब्यात घेतले. अटक करताना जातीय आणि महिलांविरोधी शिवीगाळ केल्याचा गंभीर आरोपही आहे.

“पोलिस आरोपींना पाठीशी का घालतायत?”

आंबेडकरांनी स्पष्ट केले की, सर्वोच्च न्यायालयाच्या आदेशानुसार संज्ञेय गुन्हा समजला जाऊ शकतो अशा प्रकरणात तात्काळ एफआयआर नोंदवणे बंधनकारक आहे. तरीही पुणे पोलिस आरोपींचे संरक्षण करत आहेत.

त्यांनी सवाल केला “पोलिसांना एवढी भीती कशाची? आरोपींना पाठीशी का घालताय? आंदोलनकर्त्यांनी प्रश्न विचारल्यावर टाळाटाळ करणं, हे पुणे पोलिसांच्या अपयशाचं लक्षण आहे.” वंचित बहुजन आघाडीच्या पुणे जिल्हा समित्यांनी एफआयआर नोंदवण्यास टाळाटाळ करणाऱ्या पोलिसांविरोधात आंदोलन केले. आंबेडकरांनी इशारा दिला की, जर पोलिसांनी तात्काळ कारवाई केली नाही, तर एसपी कार्यालयासमोर मोठं आंदोलन छेडलं जाईल.