Beed News: कायद्याचं रक्षण करणाऱ्याच हातून कायद्याचा गैरवापर झाल्याचा गंभीर आरोप बीड जिल्ह्यातून समोर आला आहे. एका विभक्त महिलेची वैयक्तिक परिस्थिती ओळखून धाराशिव (Dharashiv district Maharashtra) येथील एका पोलिस कर्मचाऱ्याने लग्नाचं आश्वासन देत तिचा विश्वास संपादन केला. पुढे त्याच विश्वासाचा गैरफायदा घेत मानसिक व शारीरिक छळ केल्याचा धक्कादायक आरोप करण्यात आला असून, या प्रकरणामुळे बीड (Beed district Marathwada) परिसरात मोठी खळबळ उडाली आहे.

पीडित महिला सन २०२२ पासून पतीपासून वेगळी राहत होती. या परिस्थितीचा फायदा घेत संबंधित पोलिसाने तिच्याशी संपर्क वाढवला. “मी पोलीस आहे, तुझ्या कोर्टातील प्रकरणांत मदत करीन,” असे सांगून जवळीक साधली. स्वतःचे वैवाहिक आयुष्य अडचणीत असल्याचे सांगत लवकरच घटस्फोट घेऊन लग्न करणार असल्याचे आश्वासन देण्यात आल्याचा आरोपही तक्रारीत नमूद आहे.

लॉजवर नेऊन अत्याचार केल्याचा आरोप

तक्रारीनुसार, १० ऑगस्ट २०२५ रोजी आरोपीने महिलेला माजलगाव (Majalgaon town Beed) येथील एका लॉजवर नेले. तिथे लग्नाची हमी देत जबरदस्तीने शारीरिक संबंध प्रस्थापित केल्याचा आरोप आहे. या वेळी आरोपीने काही औषधांचे सेवन केल्यामुळे पीडितेला गंभीर दुखापत झाली. परिस्थिती इतकी गंभीर होती की तिला तातडीने रुग्णालयात दाखल करून टाके घालावे लागले.

उपचारांचा खर्च आरोपीने ऑनलाइन पद्धतीने भरल्याची माहिती समोर आली असून, हा व्यवहार महत्त्वाचा पुरावा मानला जात आहे. या घटनेनंतरही आरोपीकडून तिला मानसिक त्रास देण्यात आल्याचा दावा पीडितेने केला आहे.

लग्नास नकार, धमक्या आणि जातिवाचक शिवीगाळ

काही दिवसांनी पीडितेने लग्नाबाबत विचारणा केल्यानंतर आरोपीने स्पष्ट नकार दिला. आपण पोलीस असल्याने कुणीही काही करू शकत नाही, अशी धमकी देत अपमानास्पद वागणूक दिल्याचा आरोप आहे. तसेच जातिवाचक शिवीगाळ, खासगी फोटो व्हायरल करण्याची धमकी आणि जीवे मारण्याची भीती दाखवण्यात आल्याचाही उल्लेख तक्रारीत करण्यात आला आहे.

कठोर कारवाईची मागणी

या संपूर्ण प्रकारामुळे पोलिस दलातील व्यक्तींकडूनच कायद्याचा गैरवापर होत असल्याचा गंभीर प्रश्न उपस्थित झाला आहे. पीडित महिलेने बीड आणि धाराशिव येथील पोलिस अधीक्षकांकडे लेखी तक्रार देत बलात्कार, गंभीर इजा, धमकी तसेच अॅट्रॉसिटी कायद्यान्वये गुन्हा दाखल करण्याची मागणी केली आहे. निष्पक्ष चौकशी करून दोषींवर कठोर कारवाई व्हावी, अशी जोरदार मागणी होत आहे.