Mrunal Dusanis share memory of priya marathe Couldnt meet her : मराठी सिनेविश्वात एक वेगळं स्थान मिळवलेली अभिनेत्री प्रिया मराठी (Priya Marathi actress) हिच्या निधनाने संपूर्ण कलाविश्व दु:ख निर्माण झालं आहे. तिचं जाणं म्हणजे केवळ कुटुंबीयांसाठीच नव्हे तर तिच्या चाहत्यांसाठी आणि सहकलाकारांसाठीही अपूरा धक्का आहे. अनेक सहकलाकारांनी आपल्या भावना व्यक्त केल्या, त्यात अभिनेत्री मृणाल दुसानिस (Mrinal Dusanis actress) हिनेही मन मोकळं केलं.
मृणाल म्हणाली की, प्रियाचं आयुष्य खूप कठीण प्रसंगांतून गेलं, पण तिनं कधीच हे बाहेर दिसू दिलं नाही. कॅन्सरचं निदान झाल्यानंतरही फार कमी लोकांना तीव्र आजाराबद्दल माहिती होती. अगदी इंडस्ट्रीतील जवळच्या लोकांनाही उशिरा समजलं. प्रिया नेहमीच स्वतःचं दुःख स्वतःपुरतं ठेवायची, इतरांवर ओझं टाकायचं नाही हीच तिची वृत्ती होती.
‘तू तिथे मी’ या मालिकेत दोघी एकत्र आल्या आणि त्यानंतर त्यांची घट्ट मैत्री झाली. या नात्याबद्दल बोलताना मृणाल भावनिक झाली. ती म्हणाली, “आम्ही एकमेकींना कधीच नावानं हाक मारली नाही, नेहमीच ‘ये वेडे, अगं वेडे’ असं म्हणायचो. प्रिया किती मोठ्या आजाराशी झगडतेय हे आम्हाला कळलंच नाही. तिनं इतक्या महिन्यांपर्यंत सगळं एकटीने सहन केलं.”
मृणाल पुढे म्हणाली, “काही दिवसांपूर्वीच आम्ही तिच्याशी बोललो होतो. प्रत्येक कॉलमध्ये तिच्याविषयी बोलणं आलंच. प्रिया आमच्या विचारांतून कधीच गेली नाही. ती नेहमीच खास होती. आज प्रत्येकजण तिच्याबद्दल आठवणी काढतोय. मोबाईल उघडला की तिच्याचबद्दल बातम्या दिसतात. ती मुलगी मनाने किती गोड होती, हे शब्दात मांडता येत नाही.”
अमेरिकेत झालेल्या एका आठवणीबद्दल सांगताना मृणाल आणखी भावूक झाली. ती म्हणाली, “प्रिया एका नाटकाच्या दौऱ्यासाठी अमेरिकेत आली होती. तिनं मला फोन करून भेटायला बोलावलं होतं. पण काही कारणांमुळं आमची भेट घडलीच नाही. आम्ही फक्त कुठे भेटायचं यावर बोलत होतो, पण ठिकाण ठरायच्या आधीच तिचा फोन बंद झाला. मी वारंवार फोन करत राहिले, पण संपर्क झाला नाही. नंतर ती भारतात परतली. तेव्हापासून आमची भेट होणं राहूनच गेलं. आजही त्याचं दुःख आहे.”
प्रियासोबत घालवलेले क्षण, तिच्या आठवणी, तिचं गोड व्यक्तिमत्त्व या सगळ्याचं ओझं मृणालच्या मनावर स्पष्ट दिसत होतं. जवळची मैत्रीण गमावल्याचं दुःख तिच्या प्रत्येक शब्दातून उमटत होतं.
