Marathwada Rain: गेल्या काही दिवसांपासून मराठवाडा (Marathwada Region) पावसाच्या तडाख्यात सापडला आहे. बीड, लातूर, धाराशिव, परभणी आणि हिंगोली (Hingoli District) या जिल्ह्यांमध्ये सतत मुसळधार पाऊस कोसळत असून शेतकऱ्यांचे प्रचंड नुकसान झाले आहे. या पार्श्वभूमीवर सर्वपक्षीय आमदारांनी राज्याचे उपमुख्यमंत्री आणि अर्थमंत्री अजित पवार (Ajit Pawar) यांच्याकडे थेट भेट देऊन, “मराठवाड्यात ओला दुष्काळ जाहीर करावा,” अशी मागणी केली आहे.
आमदारांची मागणी
भाजप (BJP) आमदार रत्नाकर गुट्टे (Ratnakar Gutte), राष्ट्रवादी काँग्रेस (NCP) चे राजू नवघरे (Raju Navghare), राजेश विटेकर (Rajesh Witekar) आणि ठाकरे गटाचे राहुल पाटील (Rahul Patil) यांनी मंगळवारी अजित पवारांची भेट घेतली. परभणी आणि हिंगोली जिल्ह्यात पावसाचा विशेष फटका बसल्याने शेतकऱ्यांचे सोयाबीन, ऊस, केळी यांसारख्या पिकांचे मोठे नुकसान झाल्याचे त्यांनी निदर्शनास आणले. जीवितहानीसह शेतजमीन वाहून गेल्याने शेतकरी अक्षरशः उघड्यावर आले आहेत.
आमदारांचे विधान
आमदार राजू नवघरे यांनी स्पष्ट केलं की, सरकारने तातडीने मदतीचा निर्णय घ्यावा. अजित पवार यांनी शेतकऱ्यांच्या पाठीशी उभं राहण्याचं आश्वासन दिलं आहे. रत्नाकर गुट्टे यांनीही आपल्या मतदारसंघातील नुकसानीबद्दल सांगताना म्हटलं, “गेल्या ५० वर्षांत इतका पाऊस कधीच झाला नाही. धान्य वाहून गेलं, जमिनी सुपीकतेपासून वंचित झाल्या. त्यामुळे ओला दुष्काळ जाहीर होणं गरजेचं आहे.”
कॅबिनेट बैठकीकडे लक्ष
आज होणाऱ्या कॅबिनेट बैठकीत या मागणीवर चर्चा होऊ शकते. अजित पवार यांनी आमदारांना आश्वासन दिलं आहे की या बाबतीत सकारात्मक विचार केला जाईल. ठाकरे गटाचे आमदार राहुल पाटील यांनी सांगितलं की, “शेतकऱ्यांना सरसकट मदत द्यावी लागेल. महायुतीने दिलेली वचनं आता पूर्ण करायला हवीत.”
पावसाचा तडाखा
गेल्या २४ तासांत ३२ मंडळांमध्ये अतिवृष्टीची नोंद झाली. त्यात बीड जिल्ह्यात १५, धाराशिवमध्ये ७, लातूरमध्ये ४, परभणीमध्ये ४ आणि हिंगोलीमध्ये २ मंडळांचा समावेश आहे. परभणीतील मुसळधार पावसामुळे सेलूती लोअर दुधना प्रकल्पाचे १४ दरवाजे उघडून तब्बल १४,२२८ क्यूसेक्स पाणी सोडण्यात आलं. येलदरी प्रकल्पातून १५,००० क्यूसेक्स पाणी सोडलं गेल्याने पूर्णा, दुधना आणि गोदावरी नद्या तुडुंब भरून वाहत आहेत.
हिंगोली जिल्ह्यात सोयाबीन, कापूस, हळद आणि ऊस पिकांचं अक्षरशः उध्वस्त होऊन नुकसान झालं आहे. काही शेतकऱ्यांच्या जमिनी सुपीकतेसह वाहून गेल्या आहेत. कर्ज काढून पिकं उभी केली, पण पावसाने सगळं वाहून नेलं, अशी व्यथा शेतकऱ्यांनी व्यक्त केली. पंचनामे करून तातडीने नुकसान भरपाई देण्याची मागणी शेतकऱ्यांनी केली आहे.
