Manoj Jarange & Devendra Fadnavis : मराठा आरक्षणाच्या (Maratha Reservation) मागणीवरून पेटलेल्या संघर्षाला सोमवारी नवं वळण मिळालं. मराठा आंदोलनाचे नेते मनोज जरांगे पाटील (Manoj Jarange Patil) यांनी मुख्यमंत्री देवेंद्र फडणवीस (Devendra Fadnavis) यांच्या आईबद्दल अपशब्द उच्चारल्याचा आरोप भाजप (BJP) नेत्यांनी केला.
मात्र, पत्रकार परिषदेत बोलताना मनोज जरांगेंनी हे स्पष्ट केलं की, “मी त्यांच्या आईविषयी काही बोललोच नाही. माझ्या बोलण्याच्या ओघातून तसा शब्द गेला असेल तर मी तो परत घेतो. पण मुख्यमंत्री म्हणून देवेंद्र फडणवीस यांनी मराठा समाजाला आरक्षण द्यायला हवं. पोलिसांनी आमच्या आई-बहीणींवर अन्याय केला, त्यावेळी त्या रक्ताच्या थारोळ्यात पडल्या होत्या. तुझी आई तुला जशी प्रिय आहे, तशीच आम्हाला आमची आई प्रिय आहे. तू आरक्षण दे, आम्ही तुझ्या आईची पूजा करू.”
मुंबई मोर्चाची घोषणा
अंतरवाली सराटी येथे घेतलेल्या पत्रकार परिषदेत मनोज जरांगेंनी 27 ऑगस्ट रोजी मराठा समाजाचा मोठा मोर्चा मुंबईकडे कूच करणार असल्याची घोषणा केली.
चित्रा वाघांच्या टीकेवर संताप
रविवारीच्या पत्रकार परिषदेनंतर भाजप नेत्या चित्रा वाघ (Chitra Wagh), प्रसाद लाड (Prasad Lad) यांच्यासह अनेकांनी मनोज जरांगे यांच्यावर हल्लाबोल केला. चित्रा वाघांनी “जरांगेंनी फडणवीस यांच्या आईला शिवी दिली” असा आरोप केला. त्यावरून मनोज जरांगे संतापले.
त्यांनी तीव्र शब्दांत प्रत्युत्तर देत म्हटलं – “तू माझ्या नादी लागू नकोस. जर लागलीस तर तुझं सगळं गबाळ बाहेर काढीन. संध्याकाळपर्यंत तुझ्याबाबतची माहिती माझ्याकडे येईल. जी बाई बोलली, ती वाघीण म्हणवते, तिला विचारतो – आमच्या आई रक्ताच्या थारोळ्यात पडल्या होत्या तेव्हा दिसलं नाही का? तीन-चार वर्षांच्या मुली रक्तात लोळत होत्या, तेव्हा तू झोपली होतीस का? तेव्हा तुला काहीच दिसलं नाही, आता जात जागी झाली.”
जरांगे यांचा थेट सवाल
मनोज जरांगे यांनी पुढे अधिक कठोर शब्दांत इशारा दिला – “तू बाई असशील, तर आमच्याकडेही बाया आहेत. आमच्या आईवर 307 ची गुन्ह्याची केस दाखल झाली, तुझ्यावर अशीच केस केली तर चालेल का? कशाला उगाच बोलतेस? माझ्या नादी लागू नकोस.”
पुढे काय?
आता मनोज जरांगे पाटील (Manoj Jarange Patil) यांनी केलेल्या या सडकून टीकेला चित्रा वाघ (Chitra Wagh) काय उत्तर देतात, याकडे सर्वांचे लक्ष लागले आहे. आगामी मराठा मोर्चाच्या पार्श्वभूमीवर हा वाद आणखी चिघळण्याची शक्यता आहे.
