Laxman Haake : राजकारणात परखड आणि आक्रमक भाष्यांसाठी ओळखले जाणारे ओबीसी नेते लक्ष्मण हाके यांनी राष्ट्रवादी काँग्रेसचे नेते आणि उपमुख्यमंत्री अजित पवार यांच्यावर तसेच त्यांच्या गटातील आमदार अमोल मिटकरी यांच्यावर सडकून टीका केली आहे. कोल्हापुरात झालेल्या एका कार्यक्रमात बोलताना त्यांनी दोघांवर वैयक्तिक आणि राजकीय पातळीवर गंभीर आरोप केले. त्यांच्या वक्तव्यांमुळे महाराष्ट्रातील राजकीय वर्तुळात खळबळ उडाली आहे.
“अजितदादा पोल्ट्री फार्मवाले, अर्थखात्याला पीएचडी केली का?”
हाके यांनी अजित पवार यांच्यावर अर्थखात्याच्या कामकाजावरून प्रश्नचिन्ह उपस्थित करताना त्यांची पात्रता आणि कार्यक्षमतेवरच थेट टीका केली. “गेल्या 20 वर्षांपासून अजित पवार अर्थ खात्याला चिकटून आहेत. त्यांनी अर्थखात्यावर पीएचडी केली आहे का? ते तर पोल्ट्री फार्म चालवणारे माणूस आहेत!” अशी उपहासात्मक आणि तीव्र टिप्पणी त्यांनी केली.
त्याचबरोबर त्यांनी दावा केला की, अजित पवार यांनी भटके-विमुक्त आणि मागासवर्गीय महामंडळासाठी ’50 पैसे’ सुद्धा दिले नाहीत. “आमच्या समाजाच्या वाट्याचा निधी त्यांनी अडवून ठेवला आहे,” असा आरोप करत त्यांनी राजकीय पक्षपातीपणा आणि सामाजिक अन्यायाची टीका केली.
“अमोल मिटकरी हा फडतूस बाजारू विचारवंत”
हाके यांनी अमोल मिटकरी यांच्या फॉर्च्यूनर गाडीवर केलेल्या टीकेवर प्रत्युत्तर देताना, त्यांच्यावर अत्यंत तीव्र आणि व्यक्तिगत पातळीवर टीका केली. “माझी गाडी हे माझं साधन आहे, साध्य नाही. समाजाने मला ही गाडी दिली आहे. त्यावर कोणी बोलू नये,” असे स्पष्ट करत त्यांनी मिटकरीला ‘फडतूस’ आणि ‘बाजारू विचारवंत’ असे संबोधले.
“मिटकरी अजितदादांच्या घरी झाडू मारतो, म्हणून त्याला आमदारकी मिळाली,” अशी आक्षेपार्ह आणि अपमानास्पद टीका करत हाके यांनी पुढे इशाराही दिला, “जर आम्ही त्याच्या भाषेत उत्तर दिलं, तर त्याचं आणि त्याच्या आक्याचं (अजित पवार) अंगावर कपडे राहणार नाहीत.”
“अजित पवार काकांच्या जीवावर पुढे आले”
हाके यांनी अजित पवारांच्या राजकीय प्रवासावर प्रश्नचिन्ह उपस्थित करत, “अजित पवार हे स्वतःच्या कर्तृत्वावर नाही, तर आपल्या काकांच्या (शरद पवार) जीवावर पुढे आले,” असेही सांगितले. त्याचबरोबर त्यांनी म्हटलं की, “त्यांचे खासगी कारखाने अगणित आहेत. तरीही ओबीसी समाजासाठी काहीच करायची तयारी नाही.”
“सत्तेतले सगळे एकत्र – विरोधक उरले नाहीत”
राज्यात सध्या सत्तेतील प्रमुख पक्ष एकत्र आल्याने विरोधकच अस्तित्वात उरले नाहीत, अशी खंतही हाके यांनी व्यक्त केली. “काँग्रेसचे काही लोक भाजपमध्ये जाणार आहेत. शरद पवार, सुप्रिया सुळे, रोहित पवार हेही लवकरच भाजपमध्ये जातील,” असा धक्कादायक दावा करत, त्यांनी सत्तेतील ‘गोपनिय हालचालींवर’ प्रकाश टाकला.
“मुख्यमंत्र्यांकडून अपेक्षा”
या साऱ्या घडामोडींमध्ये लक्ष्मण हाके यांनी मुख्यमंत्री देवेंद्र फडणवीस यांच्याबद्दल मात्र सकारात्मक भूमिका घेत, त्यांच्याकडून मोठ्या अपेक्षा असल्याचे स्पष्ट केले. “आमच्या समाजाने आवाज उठवला तरी ऐकला जात नाही. त्यामुळे मुख्यमंत्री आमचं म्हणणं ऐकतील, अशी अपेक्षा आहे,” असे त्यांनी सांगितले.
लक्ष्मण हाके यांच्या या परखड आणि आक्रमक वक्तव्यांनी अजित पवार गट आणि विशेषतः अमोल मिटकरी यांच्यावर दबाव वाढण्याची शक्यता आहे. यामुळे महाराष्ट्राच्या राजकारणात आगामी काळात अजून काही आक्रमक टीका-प्रतिटीकांची मालिका पाहायला मिळण्याची शक्यता आहे. ओबीसी समाजाच्या न्याय्य हक्कांसाठी आवाज उठवत असलेल्या हाके यांच्या या विधानांनी, राजकीय समीकरणांना नवी दिशा देण्याची शक्यता निर्माण झाली आहे.
laxman-haakes-attack-on-ajit-pawar-amol-mitkari
