Jammu:  जम्मू आणि काश्मीर (Jammu and Kashmir) मधील किश्तवाड़ (Kishtwar) जिल्ह्यातील परेड ताशोती परिसरात बुधवारी पहाटे ढगफुटी झाली. या नैसर्गिक आपत्तीमध्ये आतापर्यंत 10 जणांचा मृत्यू झाल्याची माहिती प्रशासनाकडून देण्यात आली असून, मृतांचा आकडा वाढण्याची भीती व्यक्त केली जात आहे. ढगफुटीमुळे अचानक आलेल्या पुरात स्थानिक लंगर शेड (सामुदायिक स्वयंपाकघर) वाहून गेले.

पूरग्रस्त भागातून माचैल माता यात्रा सुरू होत असल्याने तेथे शेकडो भाविक, लहान मुले आणि वृद्ध उपस्थित होते. घटनेनंतर केंद्रीय राज्यमंत्री डॉ. जितेंद्र सिंह (Dr. Jitendra Singh) यांनी परिस्थितीचा आढावा घेतला आणि बचाव पथके तातडीने घटनास्थळी पाठवली. नुकसानाचे मूल्यांकन व वैद्यकीय सुविधांची व्यवस्था सुरू आहे.

प्रशासनाचा तातडीचा प्रतिसाद

किश्तवाड़चे जिल्हाधिकारी पंकज शर्मा (Pankaj Sharma) यांनी सांगितले की, ढगफुटीमुळे आलेल्या पुरामुळे स्थानिक लोक आणि यात्रेकरू अडकले होते. प्रशासन, नागरी पोलीस, लष्कर, एनडीआरएफ (NDRF) आणि एसडीआरएफ (SDRF) यांच्या संयुक्त पथकांनी बचाव कार्य सुरू केले आहे.

जम्मू आणि काश्मीरचे उपराज्यपाल (Lieutenant Governor) मनोज सिन्हा (Manoj Sinha) यांनी मृतांच्या कुटुंबीयांना संवेदना व्यक्त केल्या असून, जखमींच्या लवकर प्रकृती सुधारासाठी प्रार्थना केली आहे. तसेच सर्व बचाव यंत्रणांना प्रभावित लोकांना शक्य ती सर्व मदत करण्याचे आदेश दिले आहेत.

हवामान विभागाचा सतर्कतेचा इशारा

श्रीनगर (Srinagar) हवामान केंद्राने पुढील 4 ते 6 तासांसाठी जम्मू आणि काश्मीरमधील विविध भागांमध्ये मुसळधार पावसाचा, मेघगर्जनेसह विजांचा कडकडाट व वादळी वाऱ्यांचा इशारा दिला आहे.

कुपवाडा, बारामुल्ला, बांदीपोरा, श्रीनगर, गंधर्बल, बडगाम, पुंछ, राजौरी, रियासी, उदमपूर, डोडा आणि किश्तवाड़च्या डोंगराळ भागात अल्पकाळासाठी मुसळधार पाऊस, तसेच काही ठिकाणी ढगफुटी, भूस्खलन आणि दरड कोसळण्याची शक्यता आहे. नागरिकांना विजेचे खांब, तारा आणि जुनी झाडे यांपासून दूर राहण्याचा सल्ला देण्यात आला आहे.

ढगफुटी म्हणजे काय?

ढगफुटी म्हणजे कमी वेळात, प्रामुख्याने डोंगराळ प्रदेशात, एका मर्यादित भागात होणारी अतिवृष्टी. एका तासात 100 मिलीमीटर (4 इंच) किंवा त्याहून अधिक पाऊस पडल्यास त्याला ढगफुटी म्हटले जाते. हा प्रकार ऑरोग्राफिक लिफ्ट (Orographic Lift) प्रक्रियेमुळे घडतो, ज्यात उबदार ओलसर हवा पर्वतांवर आदळून जलद वर जाते, थंड होते आणि मुसळधार पावसात रूपांतरित होते.